4 ‏- Iyul küni amérikidiki Uyghurlar bir arigha jem bolup, amérikining musteqilliq bayrimini xatirlidi

Amérikining her qaysi shitatliridin we kanadadin kelgen Uyghurlar, wirjiniye shitatidiki léyik akutnik seyligahigha yighilip, amérikining musteqilliq bayrimini qutlash bilen birge, Uyghurlarning meniwiy anisi rabiye qadir xanim bashchiliqidiki Uyghur teshkilatlirining qisqighina waqit mabeynide qolgha keltürgen netijilirini sherhilidi.

Dala seyliside söz qilghan dunya Uyghur qurultiyining re'isi rabiye qadir xanim, Uyghur dawasini téximu yuqiri pellige kötirish üchün hazirlashqa tégishlik shertlerni otturigha qoydi we Uyghurlarning nöwette élip bériliwatqan dimukratiye we kishilik hoquq kürishining amérika hökümiti we gherb elliri teripidin qollashqa érishkenlikidin özining tolimu xursen ikenlikini bildürdi.

Rabiye qadir xanim sözide yene, chet'ellerdiki Uyghur perzentlirini heqiqiy Uyghur qilip yétishtürüshning tolimu muhim bir xizmet ikenlikini, bolupmu xitay hökümiti barliq wastilerni ishlitip, weten ichidiki Uyghur balilirini öz ana tilidin mehrum qilish siyasitini yolgha qoyuwatqan bir peytte , weten sirtidiki hör ellerde yashawatqan kelgüsi ewladlarni ismi ‏- jismigha layiq Uyghur qilip yétishtürüshning ehmiyitining muhimliqini otturigha qoydi.

Amérikidiki Uyghurlar uzun yillardin béri, amérika Uyghur birleshmisining bashchiliqida amérikining müsteqilliq bayrimini xatirilesh munasiwiti bilen herxil pa'aliyetlerni uyushturup, özlirining musteqilliqqe bolghan intilish we arzu ‏- isteklirini ipadilep kelmekte. (Eqide)