Хитай һөкүмити поскамлиқ язғучи абдулла җамални қолға алди


2005-06-13
Share

Хитай җамаәт хәвпсизлик органлири өткән йили 11 - айда маралбешилиқ язғучи нурмуһәммәд ясинни қолға елип, 10 йиллиқ қамақ җазасиға һөкүм қилғандин кейин, бу йил 4 - айда поскамлиқ язғучи абдулла җамални қолға алди.

Абдулла җамал поскам наһийилик нефит базар 1 - оттура мәктәпниң оқутқучиси болуп, бу йил 4 - айда хитай җамаәт хәвпсизлик даирилири тәрипидин "миллий бөлгүнчиликни тәрғип қилидиған әсәрләр язғанлиқи үчүн" қолға елинған. Поскамдики вәқәдин хәвәрдар әрбабларниң ашкарилишичә, абдулла җамалниң қолға елинишиға униң "майбулақтики паҗиәләр" намлиқ әсири сәвәп болған болуши мумкин. Аптор мәзкур әсирини "қәшқәр уйғур нәшрияти" ға нәшр қилиш үчүн тапшурған икән.

Әсәр нәшрдин чиқмай туруп, аптори қолға елинди. Даириләр, абдулла җамалниң һазир қәйәрдә тутуп туруливатқанлиқини ашкарилашни рәт қилған болсиму, әмма кишиләр язғучиниң техичә поскамда икәнликини билдүрмәктә.

Әдлийә даирилири абдулла җамални техи сотлимиған. Мәзкур дило уйғур аптоном районида нурмуһәммәд ясинниң қамақ җазасиға һөкүм қилиниш вәқәсидин кейин, йерим йил ичидә 2 - бир уйғур язғучиниң әсәрлири сәвәбидин қолға елиниш вәқәси болуп һесаблиниду.

Абдулла җамал қолға елиништин сәл илгири, оқуғучиларни "миллий бөлгүнчиликкә күшкүртти," дегән нам билән поскам нефит базар 1 - оттура мәктибидики оқутқучилиқ хизмитидин тохтитип қоюлған. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт