Kewser xanim inisi adil ablikim bilen jem bolushni telep qildi

Gu'entanamodin albaniyige yétip barghan 5 Uyghurning biri – adil ablikim.

Ötken jüme küni güentanamo lagiridin qoyup bérilgen we albaniyige orunlashturulghan Uyghur musapirlardin adil ablikimning hedisi kewser xanim inisi bilen özi yashawatqan shwétsiyide jem bolushni telep qildi. Kewser xanim seyshenbe küni inisining qoyup bérilgenliki munasiwiti bilen muxbirlarning ziyaritini qobul qilip, "inim bilen bu yerde jem bolush we bu yerde birge yashash méning arzuyum " deydu.

Kewser xanim shwétsiye paytextining gherbide stokholmgha bir sa'et kélidighan bir jayda yashaydu. Ötken jüme küni albaniye hökümiti adil ablikim qatarliq 5 neper Uyghurni qobul qildi. Shuninggha qeder amérika tashqi ishlar ministirliqi shwétsiye qatarliq nurghun döletlerge ularni qobul qilishni iltimas qilghan bolsimu, lékin bu döletler ularni qobul qilishni ret qilghan.

Kewser xanimning eskertishiche, u inisining qoyup bérilgenlikini anglighandin kéyin "xoshalliqidin köz yashlirini tutalmighan" . Kewser xanim, "inimni oylimaydighan bir künüm yoq idi" deydu.

Kewser xanimning eskertishiche, u shwétsiyige kélishtin burun 2001 - yili memlikitidin ayrilghan we qirghizistan, pakistanlarni kézip yürüp 2002 - yili b d t musapirlar idarisining yardimi bilen shwétsiyige kélip olturaqlashqan. Lékin adil ablikimning hayat yoli hedisige qarighanda téximu qarangghu we egri- toqay ötti. U 1999 - yili qirghizistan'gha soda qilish üchün chiqip kéyinki chaghlarda güentanamodin tépilghiche, héchkim uning iz dérikini alalmighan.

Kewser xanim inisining shwétsiyige kélip olturaqlishishini ümid qilmaqta. Lékin birleshme axbarat agéntliqining eskertishiche, shwétsiye köchmenler idarisidiki da'iriler b d t din bundaq bir telep kelmigiche adil ablikimning shwétsiyige kélip hedisi bilen jem bolush mumkinchiliki yoqtek qilidu, dep tekitligen. (Erkin)