Amérika, puqralirini Uyghur aptonom rayonigha barmasliqqa agahlandurdi

Amérikining xitayda turushluq bash elchixanisi amérika puqralirini tasadipiy weqelerning qurbanigha aylinip qélishtin saqlinish üchün, Uyghur aptonom rayonigha sayahetke barmasliq toghrisida agahlandurdi.

Amérika elchixanisining agahlandurushi, xitay da'iriliri shenbe küni Uyghur aptonom rayoni qurulghanliqining 50 yilliqini tebrikleshtin bir kün burun élan qilindi.

Amérika elchixanisining agahlandurushida "rayon'gha baridighan yaki shu jayda turuwatqan amérikiliqlar pilanini éhtiyatchanliq bilen közdin köchürüp, kishilik bixeterlikige diqqet qilishi kérek," dep tekitligen.

Yéqinda sherqiy türkistan azadliq teshkilati sin'alghu lintisi tarqitip, eger xitay hökümiti rayondiki basqunchi siyasitini özgertmise, xitay nishanlirigha qoralliq qarshiliq körsitish herikitini öz ichige alghan barliq wasitiler bilen zerbe béridighanliqini jakarlighan idi.

Amérika elchixanisi, " térrorchilar hökümet emeldarliri we ammiwi nishanlarni ayrimaydu. Amérikiliqlar herbiy we saqchilar cheklik bolghan yaki bolmighan rayonlar we chégra jaylarda hujum nishanigha aylinishi mumkin," dep agahlandurdi. Bu amérika hökümitining tunji qétim amérika puqralirini Uyghur aptonom rayonigha sayahetke barmasliq toghrisida agahlandurushi bolup hésablinidu. (Erkin)