Uyghur élide eydiz bimarlirini tekshürüsh ishliri élip bérilmaqchi

Xitay hökümiti Uyghur élidiki yuqumlinish éhtimalliqi yuqiri bolghan kishiler topining eydiz wirusi bilen yuqumlinish ehwallirini igilesh üchün 12‏- aydin bashlap pütün Uyghur éli miqyasida tallap tekshürüsh élip baridighanliqini bildürdi.

Xitay hökümet metbu'atlirining xewirige qarighanda, bu qétimqi tekshürüshni Uyghur aptonom rayonluq sehiye nazariti, ediliye nazariti we jama'et xewpsizlik nazariti birlikte élip baridu. Tekshürüsh ikki türkümge bölinidu. Birinchi türkümde, türmidiki mehbuslar we tutup turush ornidiki xadimlar, ilgiri qan satqanlar, eydiz wirusi bilen yuqumlan'ghanlarning repiqisi we balilirining yuqumlinish ehwali tallap tekshürülidu. Bu bu yil 12‏- ayning 15 ‏- künidin kiler yili 1 ‏- ayning 15 ‏- künigiche dawam qilidu. Ikkinchi türkümde, zeherlik chékimlik chekküchiler, jinisiy késellik bimarliri we jinisiy soda bilen shughullan'ghuchilar, hamildar ayallar tallap tekshürülidu. Bu kiler yili 2 ‏- aydin 3 ‏- ayning axirighiche dawam qilidu.

Uyghur éli xitay boyiche eydiz wirusi eng téz tarqiliwatqan rayon. Emma Uyghur élide hazirghiche eydiz wirusning tarqilish ehwali heqqide tekshürüsh élip bérilmighan. Uyghur élide shundaqla mexsus eydiz késelliklirini dawalash ornimu yoq idi. Bu qétimqi tekshürüsh Uyghur élide tünji qétim bolup, tekshürülidighan ademler sanining 150 minggha yétidighanliri bildürülmekte. (Arzu)