Уйғур аптоном районида ана - балилар әйдиз программисиға киргүзүлгән шәһәр - наһийиләр көпәйди

Уйғур аптоном районида ана - балилар өз - ара бир - биригә әйдиз вируси тарқитишдин мудапиә көрүш программиси йолға қоюлидиған районлар давамлиқ көпәймәктә.

Мәзкур программа аптоном район бойичә үрүмчи вә ғулҗа қатарлиқ шәһәрләрдә йолға қоюлғандин кейин, әмди җилилйүз наһийиси, қәшқәр шәһири вә кучар қатарлиқ җайлар аптоном районлуқ сәһийә назарити тәрипидин 2006 - йили 1 - январдин тартип, ана - балиларниң өз ‏- ара бир - биригә әйдиз кесили тарқитиштин мудапиә көрүш программиси йолға қоюлидиған шәһәр вә наһийиләр қатариға киргүзүлди.

Мәзкур программа 2003 - йилниң кейинки йеримидин башлап, үрүмчи вә ғулҗа қатарлиқ аптоном район бойичә әйдиз кесилиниң тарқилиш әһвали әң еғир икки шәһәрдә йолға қоюлушқа башлиған.

Көзәткүчиләрниң әскәртишичә, бу программиниң юқириқи наһийә вә шәһәрләрдә йолға қоюлуши, уйғур илида әйдиз вирусиниң давамлиқ кеңийиватқанлиқидин дирәк беридикән.

Аптоном районлуқ сәһийә назаритиниң назири мәмәт ясин пәйшәнбә күни мәзкур программа йолға қоюлған наһийә вә шәһәрләрниң сәпәрвәрлик йиғинида, " нөвәттә шинҗаңда әйдиз кесили юқтурувалған кишиләр әң көп, юқумлиниш нисбити әң юқири, әйдиз кесили юқтурувалған аяллар давамлиқ көпәймәктә" дәп тәкитлигән. "

Тәңритағ тор бети" ниң хәвәр қилишичә, 2005 - йили - 1 айдин 11 - айғичә үрүмчи шәһири бойичә 60 нәпәр һамилдар аялниң әйдиз вируси билән юқумланғанлиқи ениқланған.

Тәңритағ тори, "буларниң ичидики 32 нәпәр һамилдар аялға ана - балиларниң бир - биригә әйдиз вируси тарқитишини тосаш бойичә давалаш елип берилди," дәйду. Әмма аниниң қарнидики техи туғулмиған балиларға әйдиз вирусиниң тарқилишини тосаш бойичә қандақ " давалаш" елип берилғанлиқини тилға алмиған. (Әркин)