Әнглийә хитайға әйдиз ярдәм пиланини елан қилди

Әнглийә әйдиз кесилиниң җиддий тәһдитигә дуч келиватқан уйғур аптоном райони қатарлиқ өлкә вә районларға кәлгүси 5 йил ичидә 200 милйон доллар ярдәм бериш пиланини елан қилди. Әнглийә хәлқара тәрәққият министирлиқиниң чаршәнбә күни бейҗиңда ашкарилишичә, әнглийә һөкүмити әйдиз ярдәм пилани бойичә хитайға 2011 - йилғичә 105 милйон фонт стерлиң ярдәм қилиду.

Мәтбуатларниң илгири сүрүшичә, гәнсу, сичүән, хенән, йүннән вә уйғур аптоном райони мәзкур ярдәм түридин әң көп бәһриман болидиған өлкә вә районлар болуп һесаблинидикән.

Уйғур аптоном райони хитай бойичә әйдиз кесили әң коп тарқалған вә әң тез район болуп қалди. Хитай сәһийә даирилириниң бу йилниң башлири ғулҗа шәһири бойичә елип барған бир қетимлиқ тәкшүрүш паалийитидин мәлум болушичә, ғулҗа шәһиридә нуқтилиқ тәкшүрүш елип берилған 6000 киши ичидә 4500 киши әйдиз вирусни юқтурувалған болуп чиққан вә буниң 90 % ни уйғурлар тәшкил қилмақта.

Әнглийә хәлқара тәрәққият министирлиқиниң ярдәмчи министири томасниң әскәртишичә, әйдиз биләнла чәкләнмәйдиған мәзкур ярдәм түри башланғуч маарип, тебирколизни контрол қилиш, хизмәт пурсити яритиш вә һава келиматидики өзгириш қатарлиқ түрләргә ярдәм беришни өз ичигә алидикән.

Уйғурлардики әйдиз мәсилисигә көңүл бөлгүчиләр, бу пулниң уйғур аптоном районидики әйдиз вируси кәң тарқалған җайларға йетип беришини үмид қилсиму, лекин хитай малийә министирлиқи баянатчиси йин зоңхуа, " мәзкур пилан бойичә биз йүннән вә сичүәндә алдини елиш хизмити елип бериватимиз " деди. (Әркин)