En'gliye xitaygha eydiz yardem pilanini élan qildi

En'gliye eydiz késilining jiddiy tehditige duch kéliwatqan Uyghur aptonom rayoni qatarliq ölke we rayonlargha kelgüsi 5 yil ichide 200 milyon dollar yardem bérish pilanini élan qildi. En'gliye xelq'ara tereqqiyat ministirliqining charshenbe küni béyjingda ashkarilishiche, en'gliye hökümiti eydiz yardem pilani boyiche xitaygha 2011 - yilghiche 105 milyon font stérling yardem qilidu.

Metbu'atlarning ilgiri sürüshiche, gensu, sichüen, xénen, yünnen we Uyghur aptonom rayoni mezkur yardem türidin eng köp behriman bolidighan ölke we rayonlar bolup hésablinidiken.

Uyghur aptonom rayoni xitay boyiche eydiz késili eng kop tarqalghan we eng téz rayon bolup qaldi. Xitay sehiye da'irilirining bu yilning bashliri ghulja shehiri boyiche élip barghan bir qétimliq tekshürüsh pa'aliyitidin melum bolushiche, ghulja shehiride nuqtiliq tekshürüsh élip bérilghan 6000 kishi ichide 4500 kishi eydiz wirusni yuqturuwalghan bolup chiqqan we buning 90 % ni Uyghurlar teshkil qilmaqta.

En'gliye xelq'ara tereqqiyat ministirliqining yardemchi ministiri tomasning eskertishiche, eydiz bilenla cheklenmeydighan mezkur yardem türi bashlan'ghuch ma'arip, tébirkolizni kontrol qilish, xizmet pursiti yaritish we hawa kélimatidiki özgirish qatarliq türlerge yardem bérishni öz ichige alidiken.

Uyghurlardiki eydiz mesilisige köngül bölgüchiler, bu pulning Uyghur aptonom rayonidiki eydiz wirusi keng tarqalghan jaylargha yétip bérishini ümid qilsimu, lékin xitay maliye ministirliqi bayanatchisi yin zongxu'a, " mezkur pilan boyiche biz yünnen we sichüende aldini élish xizmiti élip bériwatimiz " dédi. (Erkin)