Албанийә: бәш уйғурниң мәсилиси хитай - албанийә мунасивитигә тәсир көрсәтмәйду

2006-05-15

Албанийә мәтбуатлириниң хәвәр қилишичә, албанийә ташқи ишлар министири мустафайич, албанийә даирилиридин сияси паналиқ тилигән вә бу сәвәбтин хитай даирилириниң наразилиқини қозғиған, гуәнтанамодин кәлгән 5 нәпәр уйғур мусапирниң мәсилиси җоңго - албалинийә мунасивитигә тәсир көрсәтмәйдиғанлиқини билдүргән.

Хитай даирилири америка дөләт мудапиә министирлики тәрипидин террорчи әмәс, дәп ақланған 5 уйғурни террорлуқ тәшкилат әзаси, дәп әйиблимәктә вә албанийә һөкүмитидин уларни хитайға қайтуруп беришни тәләп қилмақта.

Хитай һөкүмити өткән һәптә хитай хәлқ қурултийиниң уйғур муавин мудири исмаил әмәтни мухбирларға сөзлитип, америкини хәлқара тероризимға күрәшни ақсатти, дәп әйиблигән.

Мустафайич, җоңго албанийә мунасивти бу вәқә сәвәбидин тәсир учримиди, дәйду. Мустафайичниң әскәртишичә, униң бу йил күздә хитайда елип баридиған зиярити бикар қилинмиған. У, зиярәт җәрянида хитай билән албанийиниң " сияси, дипломатийә вә иқтисади алақиси" күчийидиғанлиқини билдүрмәктә.

Мустафайич, 5 нәпәр уйғурниң сияси паналиқ тиләш вәқәсини өзгичә пәвқуклладә әһвал, деди. Униң әскәртишичә, албанийә һөкүмити бу бәш уйғурниң мәсилисини албанийә асаси қануни , қанунлири вә хәлқара әһдинамилар бойичә бир тәрәп қилишни ойлашмақта.

Албанийә мәтбуатлириниң анализ қилишичә, гәрчә мустафайич бу вәқә хитай - албанийә мунасивитигә тәсир көрсәтмәйду, дегән болсиму, лекин бейҗиң даирилири бу мәсилидә башқичә көз қарашта икән. Бу 5 уйғур алдинқи һәптә гуәнтанамодин қоюп берилгәндин кейин албанийәгә елип берилған, лекин бу җәрянда һечкимгә уқтуруш қилмиған. Мусапирларниң адвокати тутқунларниң техи хәтәрдин қутулмиғанлиқини әскәртмәктә вә америка һөкүмитини мәсулийәтсизлик қилиш билән әйиплимәктә. (Әркин)