B b s agéntliqi albaniyidiki besh neper Uyghur heqqide maqale élan qildi

8-Yanwar küni xitay pamir taghliq rayonida sherqiy türkistan islamiy herikitining bir herbiy meshq bazisini weyran qilip, atalmish 18 neper térrorchini öltürüp, 17 ni qolgha chüshürgenlikini élan qilghandin kéyin, bu téma xelq'ara metbu'atlardin keng orun aldi.

En'giliye radi'o téléwiziye shirkitining bb s agéntliqining xitay tili programmisi 14- yanwar küni aldinqi yili amérika teripidin albaniyige orunlashturulghan besh neper Uyghurning ehwali heqqide mexsus maqale élan qildi.

Maqalide körsitilishiche, amérika hökümiti bu besh neper Uyghurning amérikigha tehdit emeslikini körsitip ularni qoyuwetken hemde albaniyige yerleshtürgen bolsimu, biraq xitay hökümiti taki hazirghiche ularni baza teshkilatigha hésdashliq qilidighan musulman bölgünchiliri dep hésablap, tutushni meqset qilidiken.

Mezkur besh neper Uyghurning üchi -aba bekir qasim, adil abdulhékim we exmed adil bolup, ular muxbirning ziyaritini qobul qilip, özlirining arzuliri hem ehwalini bildürgen shuningdek "xitayning ularning qérindashliri yeni türkiy tilida sözleydighan Uyghurlargha basturush élip bériwatqanliqini, Uyghurlarning islam dinigha étiqad qilidighanliqi hemde uzun yillardin buyan musteqil döliti bolushni arzu qiliwatqanliqini" bildürüshken.

Maqalide körsitilishiche, mezkur besh neper Uyghur özlirining albaniyidiki turmushining köngüllük ikenlikini, albaniye xelqining ularni qarshi élip, ulargha yardem bériwatqanliqini bildürüshken, aba bekir albaniyining nahayiti kembeghelikini emma, özlirining qiyinchiliqlar aldida hergizmu xitaygha bash egmeydighanliqlirini izhar qilishqan. Ular yene özlirining alban tilini öginip, bu yerde ishleydighanliqini eskertken.

Maqalide otturigha qoyulishiche, aba bekir gu'antanamo türmisining ular üchün besh yilliq qorqunchluq chüsh ikenliki, ularning hazir bu qisqa muddetlik kechürmishlirini untushqa tirishiwatqanliqini izhar qilghan. (Ümidwar)