Albaniyige orunlashturulghan Uyghurlarning hayati barghanche ümidsizlik qaynimigha pétip barmaqta

Amérikining kuba güentanamo sahili herbiy türmisidin gunahsiz dep qoyup bérilip albaniyige jaylashturulghan 5 neper Uyghur yashning bu yerge kelginige 1 yérim yil bolay dep qalghan bolsimu , emma ularning turmushida anche köp yaxshilinishlar bolmighan bolup, gherb metbu'atlirida bu heqte bérilgen melumatlarda körsitishiche mezkur Uyghurlarning hayati barghanche ümidsizlik qaynimigha pétip barmaqta iken.

Washin'gton pochta gézitide albaniyide yashawatqan bu besh neper Uyghurni ziyaret qilip élan qilin'ghan " güentanamodin kéyin, quruq hörlük: albaniyidiki chüshkün Uyghurlar" témiliq maqalide körsitilishiche, gerche ular albaniyige ötküzüp bérilgendin kéyin hayatini yéngidin bashlashni arzu qilghan bolsimu, ularning ümidi yalghan wediler tüpeyli köpükke aylan'ghan iken.

Shu besh Uyghur yashning arisidiki yashta chongraq ababekri qasim" biz bu yerde, bala- chaqilirimizni chaqirip kélip, oqup, ishlep öz aldimizgha öy tutup musteqil hayat kechürüshni telep qilduq. Elwette bu yerdiki hayatni güentanamo türmisidiki hayatqa sélishturghili bolmaydu" dégen.

U yene , gerche ular gunahsiz dep qoyup bérilgen bolsimu , kelgüsige intayin ümidsiz qaraydighanliqini bildürgen.

Ababekri qasimning bildürüshiche yene, alban tilini bilmeslik sewebidin, bashqilar bilen alaqe qilalmay, ular köpinche waqitni musapirlar lagiridiki öyide ötküzüshke mejbur bolghan bolup, ularning hayati bala-chaqilirini, yurt- mehellini séghinish ichide ümidsiz ötidiken.

Melum bolushiche, albaniyige qoyup bérilgen besheylenni öz ichige alghan 21 neper Uyghur yash 2001- yili amérika armiyisi afghanistan'gha hujum qilip kirgende, pakistan chégrisida yerlik xelq teripidin görüge élin'ghan bolup, yerlik xelq ularning her birini 5000 dollardin amérika terepke sétiwetken iken. (Jüme)