Албанийидики уйғурларниң бу дөләттики келәчики бәк парлақ болмаслиқи мумкин


2006.06.13
Share on WhatsApp
Share on WhatsApp

Албанийә даирилири гуәнтанамодики әсирләр лагиридә 4 йил тутуп турулғандин кейин өткән айда албанийигә орунлаштурулған 5 нәпәр уйғурниң бу дөләттики келәчики бәк парлақ болмаслиқи мумкин, дәп қаримақта вә уларниң башқа бир дөләткә қайта орунлаштурулушини үмид қилмақта.

Албанийә мусапирлар комитетиниң комисари аргита тотозани, канадада чиқидиған "торонто юлтузи" гезитигә, албанийә бу 5 нәпәр уйғур бу дөләттә қалса мувапиқ болмаслиқи мумкин, дегәндә бихәтәрликни әмәс, мәдәнийәт җәһәттики сәвәбләрни көздә тутмақта, дәп көрсәтти. " Уларниң истиқбали бу йәрдә әмәс " дәп тәкитлигән аргита тотозани, " бу дөләттә уйғур җамаәтчилики йоқ, улар албан тилини билмәйду...... Уларниң бу дөләткә маканлишиш мумкинчилики йоқ. Биз уларниң истиқбали албанийидә, дәп қаримаймиз" дәйду.

"Торонто юлтузи"ниң әскәртишичә, нөвәттә америка һөкүмәт тәрәп адвокатлири бу 5 уйғурни қобул қилишни халайдиған башқа бир дөләтни издимәктә икән. Лекин америка ташқий ишлар министирлиқидики исмини ашкарилашни халимайдиған әмәлдарлар, бу кишиләрни америкиға қайта орунлаштуруш мумкинчилики рәт қилинған " һөкүмәт қарари"барлиқини билдүргән.

Тизимликтики дөләтләр ичидә канаданиң барлиқини билдүргән тотозани, " уйғурларниң канадада яхши бир җамаити бар " дәйду. Б д т мусапирлар идарисидики әмәлдарларниң илгири сүрүшичә, албанийә иқтисади сәвәбләр түпәйлидин мусапирлар сиясий панаһлиқ тиләйдиған дөләт әмәс. Б д т мусапирлар идарисиниң вәкили хосәйн карадманд, албанийә шәрқтин кәлгән мусапирлар ғәрбкә өтүдиған " өткүнчи бикәт" дәйду. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.