Albaniyidiki Uyghurlarning bu dölettiki kélechiki bek parlaq bolmasliqi mumkin

Albaniye da'iriliri gu'entanamodiki esirler lagiride 4 yil tutup turulghandin kéyin ötken ayda albaniyige orunlashturulghan 5 neper Uyghurning bu dölettiki kélechiki bek parlaq bolmasliqi mumkin, dep qarimaqta we ularning bashqa bir döletke qayta orunlashturulushini ümid qilmaqta.

Albaniye musapirlar komitétining komisari argita totozani, kanadada chiqidighan "toronto yultuzi" gézitige, albaniye bu 5 neper Uyghur bu dölette qalsa muwapiq bolmasliqi mumkin, dégende bixeterlikni emes, medeniyet jehettiki seweblerni közde tutmaqta, dep körsetti. " Ularning istiqbali bu yerde emes " dep tekitligen argita totozani, " bu dölette Uyghur jama'etchiliki yoq, ular alban tilini bilmeydu...... Ularning bu döletke makanlishish mumkinchiliki yoq. Biz ularning istiqbali albaniyide, dep qarimaymiz" deydu.

"Toronto yultuzi"ning eskertishiche, nöwette amérika hökümet terep adwokatliri bu 5 Uyghurni qobul qilishni xalaydighan bashqa bir döletni izdimekte iken. Lékin amérika tashqiy ishlar ministirliqidiki ismini ashkarilashni xalimaydighan emeldarlar, bu kishilerni amérikigha qayta orunlashturush mumkinchiliki ret qilin'ghan " hökümet qarari"barliqini bildürgen.

Tizimliktiki döletler ichide kanadaning barliqini bildürgen totozani, " Uyghurlarning kanadada yaxshi bir jama'iti bar " deydu. B d t musapirlar idarisidiki emeldarlarning ilgiri sürüshiche, albaniye iqtisadi sewebler tüpeylidin musapirlar siyasiy panahliq tileydighan dölet emes. B d t musapirlar idarisining wekili xoseyn karadmand, albaniye sherqtin kelgen musapirlar gherbke ötüdighan " ötkünchi biket" deydu. (Erkin)