Albaniye hökümiti güentanamodin qoyup bérilgen 5 neper Uyghurning siyasiy panahliqini qobul qildi

Albaniye hökümiti amérikining gu'entanamo türmisidin qoyup bérilgen 5 neper Uyghurning siyasiy panahliqini qobul qildi.

Albaniye ichki ishlar ministirining bildürüshiche, albaniyining tiranadiki musapirlar lagirida turuwatqan 5 Uyghurning albaniyidiki siyasiy panahliqi 7‏-ayning 13‏- küni resmiy qobul qilin'ghan. Amérika da'iriliri 2001‏- yili afghanistanda tutqan bu 5 Uyghurni amérika hökümiti héchqandaq térrorluq tehditi yoq dep jakarlap bu yil 5‏-ayda albaniyige ewetken idi.

Gerche xitay hökümiti izchil türde gu'entanamoda tutup turuluwatqan Uyghurlarni sherqiy türkistan islam herikiti we el-qe'ide teshkilati bilen baghlinishi bar dep eyiblep, amérikidin ularni xitaygha qayturup bérishni telep qilghan bolsimu, lékin amérika hökümiti bu Uyghurlarni üchinchi bir döletke qayturushni qarar qildi. Chünki ular xitaygha qayturulsa, xitay hökümiti teripidin térrochi we bölgünchi jinayetliri bilen eyiblinip, ölüm jazasigha höküm qilinishi mumkin.

Bu Uyghurlarni qobul qilghan albaniye hökümiti amérikining ularni albaniyige tapshurghanda bu kishilerning héchqandaq térrorchiliqqa baghlinishi yoqliqigha kapalet qilghanliqini, shundaqla xitay hökümitining bu Uyghurlarni térrorchi dep eyiblishige ispat körsitishi kéreklikini bildürgen. (Peride)