Xitay albaniyidin 5 Uyghurni ötküzüp bérishni yene telep qildi

Junggo da'iriliri jüme küni bayanat élan qilip, albaniye hökümiti teripidin siyasiy panahliq bérilgen 5 Uyghurni gumanliq térrorchilar, dep eyiblidi we ularni junggogha ötküzüp bérilishi kérek dep qaraydighanliqini tekitlidi.

Junggo tashqiy ishlar ministirliqi bu heqtiki bayanatida "bu gumanliq junggo térrorchiliri junggogha ötküzüp bérilishi we ulargha siyasiy panahliq bérilmesliki kérek" deydu. Bayanatta tashqiy ishlar ministirliqi bu 5 Uyghurni sherqiy türkistan islam partiyisining ezaliri we bu teshkilat b d t teripidin térrorluq guruh, dep étirap qilin'ghan, dep tekitligen.

Albaniye hökümiti ötken charshenbe küni bu yil 5 - ayda gu'entanamodin qoyup bérilgen bu 5 Uyghurgha siyasiy panahliq bergenlikini jakarlighan idi. Xitay tashqi ishlar ministirliqining eskertishiche, albaniye hökümiti hazirghiche junggo da'irilirige bu 5 Uyghurning siyasyi panahliqqa érishkenlikini resmiy uqturmighan.

Amérika hökümiti pakistanda esir élin'ghan bu Uyghurlarni albaniye qobul qilishtin burun, xitay terepning ularni qayturup bérish heqqidiki telipini ret qilghan we 20 dek dölettin bu Uyghurlarni qobul qilishni telep qilghan idi. Lékin albaniyidin bashqa hich bir dölet xitaylarni ghezeplendürüp qoyushtin ensirep ularni qobul qilishni xalimidi.

Ismini ashkarilashni xalimaydighan weziyettin xewerdar kishilerning eskertishiche, amérika bu 5 Uyghurni qobul qilghanliqi üchün albaniyige belgilik miqdarda pul bergen bolushi mumkin. Bulardin bashqa yene az dégende 15 neper Uyghur amérikining gu'entanamo lagirida bir terep qilinishni kütüp yatmaqta. (Erkin)