Xitayche mektepte oqughan milliy oqughuchilargha qoshup béridighan nomur töwenlitildi

Xitay hökümiti Uyghur élidiki milliy oqughuchilar bilen xitay oqughuchilarning aliy mektepke qubul qilish nomur chékidiki perqni yoqitish pilani boyiche, bu yil xitayche mektepte oqughan milliy oqughuchilargha peqet 50 nomur qoshup béridighanliqini bildürdi.

Xitay xewer torining xewiridin ashkarilinishiche, Uyghur aptonum rayonluq ma'arip nazariti bu yil xitay mektepte oqughan milliy oqughuchilargha qoshup béridighan nomurni 70 tin 50 ke chüshürüshni qarar qilghan. Emma xitay da'iriliri xewiride milliy mektepte oqughan oqughuchilargha bu yil qandaq mu'amile qilinidighanliqini tekitlimigen.

Xitay da'iriliri xewiride, "15 yil waqit ichide qedemmu qedem tedbir qollinip, milliy oqughuchilar bilen xitay oqughuchilarning aliy mektepke qubul qilinish nomur chékidiki perqni pütünley yoqitimiz" dep körsetken.

Xitay da'iriliri, oqughuchilarni aliy mekteplerge qubul qilish nomur chékidiki perqni yoqitish, milli oqughuchilarning öginish aktipchanliqini qozghaydu dep bildürmekte. Emma Uyghur küzetküchiliri, bu siyasetning téximu köp Uyghur oqughuchilarning aliy mekteplerde oquyalmasliqigha yol achidighanliqini otturigha qoymaqta. (Arzu)