خىتاي ھۆكۈمىتى ئۇيغۇر ئېلىدە ئالتۇن قېزىش يىللىق مىقدارىنى يەتتە توننىلىق ئۆتكەلدىن ئاشۇرغان

ئۇيغۇر ئېلى يەرلىك خەۋەر تورلىرىدىن ئاشكارىلىنىشىچە، ئۇيغۇر ئاپتونوم رايونلۇق ئالتۇن باشقۇرۇش ئىدارىسى يېقىندا، ئۇيغۇر ئېلىدە يىللىق ئالتۇن قېزىش مىقدارىنىڭ بۇ يىل يەتتە توننا بىر مىڭ كىلوگرامغا يېتىدىغانلىقىنى جاكارلىغان.

خەۋەرلەرگە قارىغاندا، بۇ يىل 1 - ئايدىن 11 - ئايغىچە ئۇيغۇر ئېلى ئالتۇن كانلىرىدىن قېزىلغان ئالتۇن 1999- يىلىدىن بۇيانقى ئەڭ يۇقىرى سۈپەتنى كۆرسەتكەن.

نۆۋەتتە ئۇيغۇر ئېلى خىتايدىكى ئەڭ ئاساسلىق مەدەن بايلىقلىرى بازىسى بولۇپ ئالتۇن بۇنىڭ ئىچىدىكى ئەڭ ئاساسلىق يۇقىرى قىممەتلىك مېتالنىڭ بىرى ھېسابلىنىدۇ، ئۇيغۇر ئېلىنىڭ ئىككى يۈزدەك ئورنىدا ئالتۇن كانلىرى بولۇپ،ئالتۇن زاپىسى ئاساسلىق ئالتاي تېغى، غەربىي شىمال جۇڭغار ئويمانلىقى، تەڭرىتېغى، كوئىنلۇن تاغلىرى قاتارلىق كەڭ دائىرىلەرگە جايلاشقان.

خىتاي دائىرىلىرى ئۇيغۇر ئېلىدە ئالتاي، چۆچەك، ئىلى، قۇمۇل ۋە تۇرپان ھەم سانجى قاتارلىق ئالتە نۇقتىلىق ئالتۇن رايونىدا مۇقىم ئالتۇن قازماقتا. ھازىر بۇ جايلاردا ئالتۇن تاۋلاشنى كەسپ قىلغان كان كارخانىلار 52 گە يەتكەن.

خىتاي دائىرىلىرىنىڭ بىلدۈرۈشىچە، ئۇيغۇر ئېلىدە يەنە يېڭىدىن ئالتۇن زاپىسى بايقىلىۋاتقان بولۇپ، ئالتۇن بايلىقىنى ئېچىشنى ئۆزلۈكسىز كۈچەيتىدىكەن. شۇنداقلا بۇ يىل يىللىق ئالتۇن قېزىش مىقدارى يەتتە توننىلىق ئۆتكەلدىن ئۆتكەن بولسا كېلەر يىلى ئۇنىڭدىنمۇ ئاشۇرۇشنى پىلانلىماقتا ئىكەن. نۆۋەتتە ئۇيغۇر ئېلىدە شەخسىلەر يەنى مەبلەغ سالغۇچى خىتايلار تەرىپىدىن ئېچىلىۋاتقان ئالتۇن كانلىرىنىڭ سانىمۇ بارغانچە كۆپىيىۋاتقان بولۇپ، خىتاي ھۆكۈمىتى بۇ خىل شەخسى كارخانىلارنى ئۇيغۇر ئېلى بايلىقلىرىنى كۆپلەپ ئېچىشقا رىغبەتلەندۈرمەكتە. (گۈلچېھرە)