Xitay, Uyghur élidiki altun bayliqlirini qéziwélish qedimini tizletmekte

Xitay axbarat wasitilirining ashkarilishiche, bu yilning aldinqi yérimida Uyghur élide hökümet igidarchiliqidiki altun qézish shirketliri tawlighan altun miqdari aldinqi yilining oxshash mezgildikidin körünerlik ashqan.

Tengritagh torida ili oblasti partkomining sékrétari li shiyanglinning 6- séntebir ghulja nahiyiside éytqanlirini neqil élip körsitishiche,ili wadisining qézilma bayliqliri intayin mol bolup, uning ichide altunning zapas miqdari 500 tonna etrapida iken.

Melum bolushiche, hazir Uyghur élining altun bayliqi sahesige meblegh salghan xitay karxaniliri köp bolup, bularning ichide xitay altun guruhi (中国黄金集团) , xitay altunchiliq hessidarliq shirkiti (中金股份) , shendung altun toplash guruhi (山东招金集团) , renglik métal kanchiliqi (紫金矿业) qatarliqlar Uyghur élide altun qézish qedimini tézletmekte iken.

Xewerde ashkarilinishiche, bu yilning aldinqi yérimida Uyghur élide pishshiqlap ishlen'gen altun miqdari ikki tonnidin yuqiri bolup aldinqi yildiki oxshash mezgildikidin ikki hesse ashqan.

Ghulja nahiyisige jaylashqan ashin altun qézish shirkiti bir yüz kilogramdin artuq, toli nahiyisige jaylashqan shirket yette yüz kilogramgha yéqin altun ishlepchiqarghan.

Bultur Uyghur élide jem'iy 6 ming 402 kilogram altun ishlepchiqirilghan bolup, xitay buyiche 8- orun'gha ötken. Tengritagh torida bu heqte bérilgen xewerde ashkarilinishiche, xitay bu yil Uyghur élining altun ishlepchiqirish miqdarini 7 tonnigha yetküzüp bulturqidin 10 pirsent ashurushni pilanlighan. (Jüme)