Уйғур елиниң гучуң наһийисидин зор миқдарда алтун записи байқалди


2008.03.28

Уйғур аптоном райондики ахбарат васитилириниң хәвәр қилишичә, йеқинда, уйғур аптоном райониға җайлашқан мәлум бир алтун қедирип тәкшүрүш әтрити уйғур елиниң гучуң наһийисиниң шимал қисимға җайлашқан бир қумлуқтин 24 тонна алтун записиға игә бир чоң алтун канини байқиған.

Мәзкур кандин байқалған 24 тоннилиқ алтун записи техи дәсләпки қетимлиқ тәкшүрүш нәтиҗиси болуп, бу канни байқиған алтун қидирип тәкшүрүш әтрити һазир бу җайда зор көләмлик алтун қезиш вә ишләпчиқириш һәмдә омумйүзлүк геологийилик тәкшүрүш елип берииш үчүн тәйярлиқ көрүватқан икән.

Һазир уйғур или алтунчилиқ саһәсигә хитайниң шәндуң, фуҗйән, хенән қатарлиқ өлкилиридин келип уйғур елигә йәрләшкән алтун қезиш ширкәтлири көпләп мәбләғ селиватқан болуп, уйғур аптоном районлуқ алтун башқуруш идарисиниң тор бетидә көрситилишичә, 2007 - йили уйғур елидә пишшиқлап ишлинип һесабқа елинған сап алтун 7 тонна болған.

Чәтәлләрдики уйғур тәшкилатлири, уйғур елидә ким ачса шу мәнпәәтлиниш шуари астида ечиливатқан көплигән канлар хитай өлкилиридин кәлгән ширкәт яки шәхсләрниң илкидә болғачқа, йәрлик хәлқниң бу байлиқлардин бәһриман болалмайватқанлиқини илгири сүрмәктә. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.