Wang léchu'en "amérika bashliq düshmen küchler Uyghur élining muqimliqigha tehdit salmaqta"dep körsetti

7 - Awghust Uyghur élidiki barliq xitay metbu'atliri bash bétige "bölgünchilikke qarshi küreshni chongqur , puxta ilgiri sürüp shinjangning muqimliqini dawamliq qoghdash kérek" serlewhilik xewer bésildi.

Xewerdin ashkarilinishiche, 5 - hem 6 - awghust künliri Uyghur élide idé'ologiye we siyasiy qanun sistémisining muqimliq xizmiti yighini échilghan bolup , yighinda partkom sékritari wang léchu'en amérikini düshmen küch dep resmiy tekitlep " gherbtiki amérika bashliq düshmen küchlerning insaniy hoquq , millet, din qatarliq mesililerdin paydilinip Uyghur élini parchilash, gherbleshtürüsh süyqesti bar " dep körsetken .

Wang léchu'en yighinda yene , xitay kommunist partiyisi 17 - nöwetlik qurultiyining ghelibilik échilishi üchün , Uyghur aptonom rayonida xitay merkizi hökümitining Uyghur élining muqimliqini qoghdash toghrisidiki türlük chong tedbiri we aptonom rayonluq partkomning orunlashturushi bilen idé'ologiye we siyasiy qanun séstimisining bölgünchilikke qarshi turush ,singip kirishning aldini élish xizmitide birinchi septe turup , amérika qatarliq düshmen küchlerning muqimliqqa séliwatqan tehditini tonup yétip " qattiq zerbe bérish, qattiq bésim ishlitish " weziyitini saqlap , üch xil küchlerge zerbe bérishni yenimu puxta kücheytip , muqimliqqa kapaletlik qilish bilen teng yene Uyghur aptonom rayonining güllen'gen , bay, inaq, yaxshi weziyitini sirtqa teshwiq qilishni kücheytish kérek " dégen.

Dunya Uyghur qurultiyining bayanatchisi dilshat réshit bügün , wang léchu'enning yuqurqi bayanlirigha qarshi bayanat élan qilip , wang léchu'enning bu sözliri , xitayning 2008 olimpik we 17 -nöwetlik partiye qurultéyi harpisida Uyghur élide yenimu qattiq siyasiy basturush heriketlirini élip bérishning bir signali dep bildürdi . Mezkur xewer heqqide weqe hem mulahize sehipimizde yenimu tepsiliy melumatlar bermekchimiz. (Gülchéhre)