Amérika Uyghurliri roza héytni kütüwaldi

10-Ayning 13-küni amérika paytexti washin'gton yénidiki shimaliy wirginiye ijtima'iy aliy téxnikomning érnist medeniyet merkizide Uyghurlarning roza héyt pa'aliyiti ötküzüldi.

Amérika Uyghurliri birleshmisi bilen xelq'ara Uyghur kishilik hoquq we démokratiye fondi jem'iyitining birliship teshkillishi astida ötküzülgen bu pa'aliyetke washin'gton etrapida yashaydighan we bashqa shtatlardin kelgen 250din artuq Uyghur we Uyghurlarning dostliri ishtirak qildi.

Échilish murasimida söz qilghan Uyghur milliy herikitining rehbiri, dunya Uyghur qurultiyi re'isi rabiye qadir xanim weten ichi we sirtidiki barliq Uyghurlarni jümlidin musulmanlarni roza héyti bilen tebriklesh bilen birge Uyghurlargha heqiqiy xushal héyt keypiyati tilidi.

" Bügün wetenning hemme yéride héyt, Uyghurlar samagha chüshmekte, bir-birini héyt bilen tebrikleshmekte, lékin, ularning bu héyti xitay da'irilirining bésimi we zulumi astida ötüwatqanliqi üchün ular özlirini heqiqeten xushal we erkin hés qilalmaydu, dunyaning bashqa erkin, musteqil musulman xelqlirige oxshash keypiyatta héyt ötküzelmeydu. Ularning oynighan samalirida achchiq we ghezep hem qayghu ipadilinip turidu" dep sözini bashlighan rabiye qadir xanim weten ichi-sirtidiki barliq Uyghurlarni öz hoquqliri, erkinlikini qolgha keltürüsh we milliy kimliki, dini kimlikini qoghdash üchün ortaq küresh qilishqa chaqirdi. Bügünki mezkur roza héyt pa'aliyitige amérika dölet mejlisi kishilik hoquq komitétining wekilimu ishtirak qilip, Uyghurlarni tebriklidi. Köpchilik qoyuq milliy puraqqa ige muzikilargha jür bolup usul oynap, héyt xushalliqini ipadilidi.

Amérika Uyghurliri mundaq shekildiki birleshme pa'aliyetlerni izchil ötküzüp kelmekte.

Amérika Uyghurliri birleshmisi we dunya Uyghur qurultiyi yene, bu yil 11-ayning 12-küni, washin'gton etrapida 1933-yili we 1944-yili 12-noyabirda qurulghan sherqiy türkistan jumhuriyet künini daghdughiliq ötküzüsh üchünmu teyyarliq qilmaqta.(Ümidwar)