Хәлқара кәчүрүм тәшкилати қазақистанда тутуп қелинған икки уйғур тоғрисида баянат елан қилди


2006.04.25
Share on WhatsApp
Share on WhatsApp

Хәлқара кәчүрүм тәшкилати сәйшәнбә күни баянат елан қилип, қазақистан даирилирини тутуп қелинған йүсүп қадир тохти вә абдуқадир сидиқ қатарлиқ икки уйғур сияси мусапирини хитайға қайтуруп бәрмәсликкә чақирди. Йүсүп қадир тохти вә абдуқадир сидиқлар 2006 - йили 3 - айдин бери қазақистан даирилири тәрипидин тутуп турулмақта.

Хәлқара кәчүрүм тәшкилати бу һәқтики баянатида "җуңго һөкүмити изчил түрдә уларни өткүзүвелишни тәләп қилип кәлди. Әгәр улар хитайға өткүзүп берилсә, тән җазаси яки қанунсиз муамилигә учраш, әгәр 'җинайити' 'еғир,' дәп қаралса өлүм җазасиға һөкүм қилиниш мумкинчилики мәвҗут " дәйду.

Кәчүрүм тәшкилатиниң әскәртишичә, 1996- йили хитайдин айрилған вә 2006 - йили 3 - айда қазақистан даирилири тәрипидин тутуп қелинғичә диний тәлим тәрбийә билән шуғулланған йүсүп қадир тохтини, хитай һөкүмити " бөлгүнчилик" билән әйиблигән. Абдуқадир сидиқ илгири хитай һөкүмитиниң уйғур сиясити, туғут чәкләш вә һашар сияситини тәнқидлигәнлики үчүн түрмигә соланған вә түрмидин чиққандин кейин юртини тәрк етишкә мәҗбур болған икән.

Абдуқадир сидиқ өзини чәткә елиш үчүн хитай - қазақистан чегрисидин өтүватқанда қазақистан чигра даирилири тәрипидин қолға елинған вә қазақистан һөкүмити уни қанунсиз чегридин өтүш билән әйиблигән һәм 6 айлиқ қамақ җазасиға һөкүм қилған.

Хәлқара кәчүрүм тәшкилати баянатида "йеқинқи йиллардин бери қошна әлләрдин хитайға мәҗбури қайтурулған уйғурларниң көпийиватқанлиқиға диққәт қилмақтимиз , қайтурулғанлар тән җазаси, адаләтсиз сотлиниш вә өлүм җазаси қатарлиқ кишилик һоқуқ зиянкәшликиниң нишаниға айланмақта " деди. Хәлқара кәчүрүм тәшкилати қазақистанни б д т мусапирлар әһдинамисиға риайә қилишқа чақирған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.