خەلقئارا كەچۈرۈم تەشكىلاتى رابىيە قادىر ھەققىدە ئاخبارات ئېلان قىلدى


2005-09-08
Share

دۇنيادىكى داڭلىق كىشىلىك ھوقۇق تەشكىلاتى بولغان خەلقئارا كەچۈرۈم تەشكىلاتى پەيشەنبە كۈنى ئاتاغلىق ئۇيغۇر پائالىيەتچىسى رابىيە قادىر ئائىلىسىنىڭ خىتاي ساقچىلىرى تەرىپىدىن تۇتقۇن قىلىش ۋە سوراققا تارتىشقا ئوخشاش ئاۋارىچىلىقلارغا يولۇقىۋاتقانلىقى ھەققىدە ئاخبارات ئېلان قىلدى.

باش شىتابى لوندوندىكى خەلقئارا كەچۈرۈم تەشكىلاتىنىڭ ئامېرىكا شۆبىسى مەزكۇر باياناتىدا، خىتاي دائىرىلىرىنىڭ يېقىنقى بىر نەچچە ئايدىن بۇيان رابىيە قادىرنىڭ ئوغلى ئالىم ئابدۇرېھىمنى ۋە ئۇنىڭ تۇققانلىرىنى تۇتۇپ كېتىپ سوراققا تارتقانلىقىنى ھەمدە ساقچىلارنىڭ ئالىمنى رابىيە خانىمنىڭ ئەقىدە شىركىتىنىڭ باجدىن قاچقانلىقىنى ئېتىراپ قىلىپ قەغەزگە قول قويۇشقا قىستىغانلىقىنى مەلۇم قىلغان.

ئالىم ئابدۇرېھىم بۇنىڭغا قول قويۇشقا ئۇنىمىغاندا، ھەتتا ساقچىلار ئۇنىڭغا " ھازىر قول قويمىساڭ، تۈرمىدە قوۋۇرغاڭ سۇنغاندا ئاندىن قول قويىسەن" دەپ ھەيۋە قىلغان. خەلقئارا كەچۈرۈم تەشكىلاتى بۇ باياناتىدا يەنە، خىتاي دائىرىلىرىنىڭ "بۆلگۈنچى" دەپ ئەيىبلەپ كېلىۋاتقان ئۇيغۇر مۇستەقىلچىلىرىنى 11 - سېنتەبىردىن كېيىنلا "تېررورچى" دەپ ئەيىبلەشكە ئۆزگەرگەنلىكىنى يازغان.

خەلقئارا كەچۈرۈم تەشكىلاتى، رابىيە قادىر خىتاي ھۆكۈمىتى تەرىپىدىن قولغا ئېلىنغاندىن بۇيان، رابىيە قادىرنىڭ مەسىلىسىدە توختىماي ھەرىكەت قىلغان ھەمدە رابىيە خانىمنىڭ قويۇپ بېرىلىشىدە مۇھىم رول ئوينىغان. (پەرىدە)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت