Хәлқара кәчүрүм тәшкилати рабийә қадир һәққидә ахбарат елан қилди


2005.09.08

Дунядики даңлиқ кишилик һоқуқ тәшкилати болған хәлқара кәчүрүм тәшкилати пәйшәнбә күни атағлиқ уйғур паалийәтчиси рабийә қадир аилисиниң хитай сақчилири тәрипидин тутқун қилиш вә сораққа тартишқа охшаш аваричилиқларға йолуқиватқанлиқи һәққидә ахбарат елан қилди.

Баш шитаби лондондики хәлқара кәчүрүм тәшкилатиниң америка шөбиси мәзкур баянатида, хитай даирилириниң йеқинқи бир нәччә айдин буян рабийә қадирниң оғли алим абдуреһимни вә униң туққанлирини тутуп кетип сораққа тартқанлиқини һәмдә сақчиларниң алимни рабийә ханимниң әқидә ширкитиниң баҗдин қачқанлиқини етирап қилип қәғәзгә қол қоюшқа қистиғанлиқини мәлум қилған.

Алим абдуреһим буниңға қол қоюшқа унимиғанда, һәтта сақчилар униңға " һазир қол қоймисаң, түрмидә қовурғаң сунғанда андин қол қойисән" дәп һәйвә қилған. Хәлқара кәчүрүм тәшкилати бу баянатида йәнә, хитай даирилириниң "бөлгүнчи" дәп әйибләп келиватқан уйғур мустәқилчилирини 11 - сентәбирдин кейинла "террорчи" дәп әйибләшкә өзгәргәнликини язған.

Хәлқара кәчүрүм тәшкилати, рабийә қадир хитай һөкүмити тәрипидин қолға елинғандин буян, рабийә қадирниң мәсилисидә тохтимай һәрикәт қилған һәмдә рабийә ханимниң қоюп берилишидә муһим рол ойниған. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.