Uyghur élining jenubidiki bezi jaylada qar apiti yüz berdi

Shinxu'a axbarat agéntliqining xewer qilishiche, qeshqer bilen xotende 21 - féwralghiche 30 ming tuyaq charwa mal qar apitide ölgen. Buning ichide xotenning guma nahiyiside ölgen charwa mallarning sani 14 ming tuyaq bolup, 245 éghiz öy örülgen.

17 - Féwraldin bashlap yéghishqa bashlighan qarning qélinliqi, xoten, qeshqer we qizilsudiki bir qisim nahiye we sheherlerde 30 santimétirgha yetti. Bu yuqiriqi rayonlarda yéqinqi 20 yildin béri yaghqan eng qélin qar bolup hésablinidiken.

Guma nahiyisidiki da'irilerning bildürüshiche, 12 ming tuyaq charwa mal gumaning taghliq rayonidiki qishlaqlarda qamilap qalghan. Yeken taghliq rayonida charwichiliq bilen shughullinidighan 19 kenttiki 30 ming tuyaq charwa mal yem - xesheksiz qalghan. Yolni qar bésiwalghanliqtin apet rayonidiki charwuchilargha qutquzush buyumlirini yetküzüsh qiyinchiliqqa uchrimaqtiken.

Shinxu'a axbarat agéntliqining xewer qilishiche, yerlik da'iriler apet rayonidikiler üchün xoten wilayiti boyiche puqralardin 1 milyon 400 ming yü'en pul toplighan.

Uyghur élining xoten, qeshqer qatarliq jaylirigha xoshna bolghan hindistan bashqurushidiki keshmir rayonidimu qattiq qar yaghqan bolup, s n n (CNN) ning xewer qilishiche, mezkur rayonda 154 adem ölgen, 200 din artuq ademning iz-dériki bolmighan.(Erkin)