Uyghur élidiki 5 orunda tagh gewdisi gümürülüsh we qar köchüsh apiti yüz berdi

• 
  2006-03-20

Yéqinqi künlerdin buyan, pakistandiki bir qisim rayonlarda uda qar yéghip, Uyghur élining pakistan bilen tutishidighan rayonlardiki 5 orunda tagh gewdisi gümürülüsh we qar köchüsh apiti yüz berdi. Buning bilen ikki terep arisidiki tashyolda qatnash üzülüp qélip, aptomobillar qapsilip qaldi.

Qeshqer qonjirap chégra éghizini bashqurush ishxanisidiki xadimlarning bildürüshiche, bu apet sewebidin pakistan'gha baridighan 87 aptomobil qonjirap chégra éghizida turup qalghan. Hetta bu yerde kütüp turiwatqan aptomobillarning bezilirige 10 nechche kün bolghan.

Hazir, qeshqer wilayetlik memuriy mehkime pakistan terep bilen alaqiliship, pakistan tereptin yollarni imkanqeder téz rawanlashturup, turup qalghan aptomobillarning tézdin chégridin chiqishigha kapaletlik qilishini telep qilghan. Emma munasiwetlik da'iriler tash yol qatnishining qachan eslige kélidighanliqini perez qilishning teslikini bildürmekte.

Bu yil qish Uyghur élide soghaq hawa we qar apiti sewebidin kélip chiqqan apetler bir qeder köp körülgen bolup, Uyghur élining altay wilayitidiki qar apitidimu nurghun charwa mallar ölgen hemde nurghunliri yem-xesheksiz qalghan idi.(Peride)