Тәбий апәт түпәйли еғир зиян тартқан деһқанлар яллинип ишләшкә мәҗбур болмақта

Сибирийиниң соғақ һава еқиминиң зәрбиси түпәйли уйғур елида -8априлдин башлап он күнләргичә давам қилған қар ямғур, уйғур елиниң деһқанчилиқиға зор дәриҗидә зиян елип кәлгән иди . Нөвәттә апәт сәвәбидин зор зиянға учрап бу йил һосул елиштин үмиди үзүлгән көп сандики деһқанлар йәрлирини ташлап шәһәр наһийиләргә кирип иш издимәктә икән.

Қәшқәр һөкүмәт торидин ашкарилинишичә, нөвәттә маралбеши, пәйзиват қатарлиқ наһийәләрдә йеңидин елип бериливатқан йәр тәврәшкә тақабил туруш өй қурулишлирида ишләватқан уйғур деһқан ишчилар 70 %ни игилигән.

Униңдин башқа һазир уйғур елида елип бериливатқан таш йол, су иншаати қурулушлириға охшаш орунлардиму уйғур деһқанлири көпийишкә башлиған. Қәшқәр вилайитидин 60 миңға йеқин уйғур деһқан йәрлирини ташлап наһийә шәһәрләрдин иш излигили киргән. Улардин башқа йәнә 23миңдин артуқ деһқан бәзи вакаләт орунлири арқилиқ вақитлиқ иш тапқан.

Гәрчә хитай даирилири деһқанларниң һазирқи қийинчилиқни йеңишта йәрлирини ташлап вақитлиқ иш издәшкә риғбәтләндүриватқан болсиму әмма деһқанларниң тәбиий апәт зәрбисидин тартқан зиянлирини йениклитишкә қандақ тәдбир алғанлиқини тилға алмиди. (Гүлчеһрә)