Или дәряси вадисидики кәлкүн апитиниң зийиниға учриған хәлқ 10 миңдин ашти

Хитайда 1‏-май әмгәкчиләр байрими тәбриклиниватқан мәзгилдә , уйғур елиниң шималий қисимлирида тохтимай ямғур яғқанлиқтин, или дәряси вадисида кәлкүн апити йүз бәрди. Бу кәлкүнниң зийиниға учриған кишиниң сани 10 миңдин ешип, 18 милйон йүәндин көп иқтисадий зиян келип чиққан.

Хитай хәвәр агентлиқиниң мәлум қилишичә, нөвәттә мунасивәтлик орунлар қутқузуш ишлирини елип бериватқан болуп, кәлкүн тәсиригә учриған хәлқләр башқа җайларға йөткәп орунлаштурулмақта икән. Лекин хәвәрдә қанчилик аһалиниң көчүшкә мәҗбур болғанлиқи һәққидә тәпсилий санлиқ мәлумат берилмигән.

Буниңдин сирт йәнә, хитайниң уйғур елидики биңтуән ‏- ишләпчиқириш қурулуш армийисиниң қорғастики деһқанчилиқ 4‏-девизийисиму охшашла боранлиқ ямғур апитигә учрап, бу йәрдики 20 миң моға йеқин кевәзлик вә бағвәнчилик мәйданлири зиянға учриған. Шундақла буниңдин келип чиққан бивастә иқтисадий зиян 5 милйон йүәндин ашқан.

Мәзкур девизийә хадимлири һазир 200 миң парчидин ошуқ борандин сақлиниш пиластик япқучлар билән терилғу мәйданларниң үстини йепишқа тиришмақта. Бу йил уйғур елидә мушуниңға охшаш боранлиқ ямғур, кәлкүн вә қум бориниға охшаш тәбиий апәтләр бир қәдәр еғир көрүлди. Бир қисим мутәхәсссиләр буниң йәр шари килиматиниң иссип кетишигә мунасивәтлик икәнликини оттуриға қоймақта. (Пәридә)