Xitay ottura asiyagha qaratqan teshwiqatni kücheytmekte

Shinjang xewer torining uchurigha qarighanda, xitay kompartiyisi we hökümitining awazi bolghan shinjang xelq radi'o istansisi qazaq tilida radi'o programmisi anglatqanliqining 50 yilliqini daghdughiliq xatiriligen.

Bu xatirilesh pa'aliyitige Uyghur aptonom rayoni rehberliridin esxet kérimbay we nur bekri qatarliqlar qatniship söz qilghan. Nur bekri qazaq tilidiki programmilarning téz sürette sirtqa yüzlinish nishanini üchün xizmet qilip, shinjangning yaxshi sirtqi obrazini tiklishini ümid qilidighanliqini shuningdek shinjang xelq radi'o istansisining teshwiqat küchini ashurushining muhimliqini tekitligen hem bu arqiliq muqimliq, islahat we tereqqiyat üchün töhpe qoshushni telep qilghan.

Xewerde körsitilishiche deslepki waqitta kündilik qazaqche anglitish peqet 30 minut bolghan bolsa, hazir u köpeytilip 18 sa'et 30 minutqa yetküzülgen.

Xewerlerge qarighanda xitay da'iriliri yéqinqi yillardin buyan nurghun meblegh ajritip ottura asiya döletlirige qaritilghan teshwiqatni kücheytishke ehmiyet bergen . Ötken yilidin étibaren özbékistan, qirghizistan'gha her küni "junggo awazi" namida Uyghurche we qirghizche radi'o anglitish hem téléwiziye programmisi tarqitishni yolgha qoyghan. Almutida mexsus shinjang medeniyet heptililiki ötküzgen hemde qazaqlar turmushigha a'it kino qoyush qatarliq türlük pa'aliyetlerni élip barghan.

Xitay da'irliri qazaq, qirghiz we Uyghur tillardiki mexsus radi'o we téléwiziye programmiliri arqiliq xitayning tereqqiyati we küch-quwwitini shuningdek kompartiye rehberlikide her qaysi milletlerning ittipaq we bextiyar yashawatqanliqini namayen qilmaqchi bolghan. (Ümidwar)