Чиң гаң рабийә қадирниң " айропилан булаш вәқәси" һәққидики баянатини рәт қилди


2008-03-11
Share

Дүшәнбә күни уйғур миллий һәрикити рәһбири вә дуня уйғур қурултейи рәиси рабийә қадир ханим бир қисим хәлқара ахбарат орунлириниң зияритини қобул қилғанда, хитай даирилириниң үрүмчидин бейҗиңға учқан айрупиланда уйғурларниң хәтәр туғдурмақчи болғанлиқи һәққидә тарқатқан хәвәрлири мунасивити билән баянат берип": хитай һөкүмити уйғурларниң айрупилан партлитиш вәқәси пиланлиғанлиқи һәққидики хәвәрләр арқилиқ уйғур миллий һәрикитини террорчилиққа бағлашқа урунмақта " дәп әйиблигән иди.

Ройтерис агентлиқиниң 11 - март хәвәр қилишичә, бүгүн хитай ташқи ишлар баянатчиси чиң гаң мәзкүр вәқә һәққидә мухбирларниң соалиға җаваб бәргәндә, рабийә қадирниң юқурқи баянатиға рәддийә бәргән болуп, у " рабийә қадирға охшаш бир қисим кишиләр җуңго һөкүмитиниң хәлқаралиқ террорчилиққа қарши һәрикитини уйғурға қарши һәрикәт дәп көрситип бу җәрянда хитай хәлқи билән уйғурлар арисида иттипақсизлиқ шәкилләндүрмәкчи. Рабийә қадир көп сандики уйғурларға вәкиллик қилалмайду, у пәқәт аз сандики террорчиларға вәкиллик қилиду. Көп сандики уйғурлар йәнила террорлуққа қарши туриду " дегән.

Әмма, чиң гаң хитай даирилири тәрипидин7 - март тарқитилған уйғурларниң үрүмчидин бейҗиңға қатнайдиған CZ6091 нөвәтчи айрупиланида партлитиш вәқәси туғдурушқа урунғанлиқи һәққидики хәвәрниң деталлири тоғрисида йәнила инчикә тохталмиған.

Шәнбә күни уйғур аптоном райониниң рәиси нур бәкри бейҗиңда мухбирларға бу вәқәни ашкарилиғанда вәқәгә мунасивәтлик һечқандақ пакит көрсәтмигән. Уйғур аптоном райони парткоминиң секритари ваң лечүән болса вәқә пәйда қилғучиларниң уйғурлар икәнликидин бишарәт бәргән иди һәм вәқәни бейҗиң олимпик йиғини билән бағлап, " бәзиләр өлә -тирилишиға қаримай олимпик йиғинини бузмақчи болуватиду " дәп тәкитлигән иди.

Һалбуки, җәнуб һава йоллири ширкитиниң бир әмәлдари өзиниң вәқәни террорлуқ һәрикәт, дәп муқимлаштуралмайдиғанлиқини, вәқәниң характерини җамаәт хәвпсизлик органлириниң бекитидиғанлиқини билдүргән иди.

Нөвәттә мәзкүр вәқә хәлқара мәтбуатлардиму қизиқиш қозғиған болуп, бу һәқтә кишилик һоқуқни көзитиш тәшкилатиниң асия ишлири тәтқиқатчиси фәлим кин, " бизниң әнсирәватқинимиз, хитай һөкүмитиниң бу вәқәни баһанә қилип, шинҗаңдики уйғурларға қарши йеңи бастуруш һәрикити қозғаш еһтимали шундақла олимпик һарписида охшимиған пикирдә болғучиларни йоқитиш хәвпидур " дәп агаһландурған. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт