Ching gang rabiye qadirning " ayropilan bulash weqesi" heqqidiki bayanatini ret qildi

Düshenbe küni Uyghur milliy herikiti rehbiri we dunya Uyghur qurultéyi re'isi rabiye qadir xanim bir qisim xelq'ara axbarat orunlirining ziyaritini qobul qilghanda, xitay da'irilirining ürümchidin béyjinggha uchqan ayrupilanda Uyghurlarning xeter tughdurmaqchi bolghanliqi heqqide tarqatqan xewerliri munasiwiti bilen bayanat bérip": xitay hökümiti Uyghurlarning ayrupilan partlitish weqesi pilanlighanliqi heqqidiki xewerler arqiliq Uyghur milliy herikitini térrorchiliqqa baghlashqa urunmaqta " dep eyibligen idi.

Roytér'is agéntliqining 11 - mart xewer qilishiche, bügün xitay tashqi ishlar bayanatchisi ching gang mezkür weqe heqqide muxbirlarning so'aligha jawab bergende, rabiye qadirning yuqurqi bayanatigha reddiye bergen bolup, u " rabiye qadirgha oxshash bir qisim kishiler junggo hökümitining xelq'araliq térrorchiliqqa qarshi herikitini Uyghurgha qarshi heriket dep körsitip bu jeryanda xitay xelqi bilen Uyghurlar arisida ittipaqsizliq shekillendürmekchi. Rabiye qadir köp sandiki Uyghurlargha wekillik qilalmaydu, u peqet az sandiki térrorchilargha wekillik qilidu. Köp sandiki Uyghurlar yenila térrorluqqa qarshi turidu " dégen.

Emma, ching gang xitay da'iriliri teripidin7 - mart tarqitilghan Uyghurlarning ürümchidin béyjinggha qatnaydighan CZ6091 nöwetchi ayrupilanida partlitish weqesi tughdurushqa urun'ghanliqi heqqidiki xewerning détalliri toghrisida yenila inchike toxtalmighan.

Shenbe küni Uyghur aptonom rayonining re'isi nur bekri béyjingda muxbirlargha bu weqeni ashkarilighanda weqege munasiwetlik héchqandaq pakit körsetmigen. Uyghur aptonom rayoni partkomining sékritari wang léchüen bolsa weqe peyda qilghuchilarning Uyghurlar ikenlikidin bisharet bergen idi hem weqeni béyjing olimpik yighini bilen baghlap, " beziler öle -tirilishigha qarimay olimpik yighinini buzmaqchi boluwatidu " dep tekitligen idi.

Halbuki, jenub hawa yolliri shirkitining bir emeldari özining weqeni térrorluq heriket, dep muqimlashturalmaydighanliqini, weqening xaraktérini jama'et xewpsizlik organlirining békitidighanliqini bildürgen idi.

Nöwette mezkür weqe xelq'ara metbu'atlardimu qiziqish qozghighan bolup, bu heqte kishilik hoquqni közitish teshkilatining asiya ishliri tetqiqatchisi felim kin, " bizning ensirewatqinimiz, xitay hökümitining bu weqeni bahane qilip, shinjangdiki Uyghurlargha qarshi yéngi basturush herikiti qozghash éhtimali shundaqla olimpik harpisida oxshimighan pikirde bolghuchilarni yoqitish xewpidur " dep agahlandurghan. (Gülchéhre)