Xitay sherqiy türkistan azadliq teshkilatini narin weqesige chatti

Seyshenbe küni sherqiy türkistan küchlirini Uyghur aptonom rayonida yéqinqi 10 yildin béri 160 puqrani öltürüsh, 260 qétim weqe sadir qilish bilen eyibligen xitay térrorizimgha qarshi turush idarisining mu'awini jaw yongchin, shinxu'a axbarat agéntliqigha 2003 - yili 4 - ayda qirghizistanning narén rayonida yüz bergen Uyghur sodigerlerni öltürüsh weqesining sherqiy türkistan azadliq teshkilati teripidin élip bérilghanliqini ilgiri sürdi.

Emma kishilik hoquq teshkilatliri jawning sözini xitaylarning Uyghurlarni basturush herikitige bahane tépish tirishchanliqi, dep baha bermekte.

Jaw, sherqiy türkistan küchliri" yalghuz jonggoghila emes, pütün rayonning bixeterliki we muqimliqigha tehdit," deydu. U, sherqiy türkistan küchlirini mektep we yeslilerge zeher tashlash we partlitishni pilanlash bilen eyibligen.

Emma, merkizi nyu - yorktiki jonggo kishilik hoquqi teshkilatining xongkongda turushluq wekili nikolas békyulin, xitay da'irilirini "ular shinjangda az sanliq milletlerning hoquqi we diniy erkinlikini zor we jiddi yosunda depsende qilishni qanunlashturush yolini tutmaqta," dep eyibligen. Békyulinning tekitlishiche, " hökümet térrorizimni bahane qilish yaki guman qozghash arqilq chet'el döletlirining diqqet - nezirini bu rayonda yüz bériwatqan weqelerdin yiraqlashturushni oylaydiken. (Erkin)