Австралийә гезитлири оғрилап кетилгән уйғур балилириниң хитай өлкилиридә янчуқчилиққа селиниватқанлиқини ашкарилиди

Хитайда йеқинда, миңлиған балиларниң көмүр кан яки хиш завутлирида қул қилинғанлиқиниң пакитлири паш болғандин кейин, хитайдики интернет тор бәтлиридә йәнә, уйғур балилириниң өз юртидин оғрилап кетилгәнлики, уларниң хитайниң ички өлкилиридә янчуқчилиққа селинғанливатқанлиқи һәққидики пакитлар паш қилинишқа башлиди. Австралийидә чиқидиған NSW хәвәрлириниң мухбири рован калликниң 27 ‏- ийон күни бу һәқтики учурларни топлап хәвәр қилишичә, өз юртидин оғрилап кетилгән 4000 нәпәр уйғур балиси хитайниң ички өлкилиридә 'җинайәт маһирлири' тәрипидин янчуқчилиққа өгитилгән.

11 яшлиқ бир балиниң мухбирға ейтип беришичә, улар хитайниң ички өлкилиригә елип келингәндин кейин, қайнап турған судин ярмақ сүзүшни мәшқ қилдурулуп янчуқчилиққа өгитилгән. Шуниңдин кейин қара гуруһларға 1000 юәндин сетивитилгән.

Хоҗайинлар бу балиларниң оғуллирини зәһәрлик чекимликкә, қизлирини шәһванийлиққа мәҗбурлиған. Адәттә улар һәр күни 100 юәндин 350 юәнгичә пул оғрилап кәлмисә, хоҗайинниң қаттиқ тән җазасиға учрайдикән. Һазир хитайниң ички өлкилиридә янчуқчилиққа селиниватқан балиларниң% 13 уйғур балилири.

Хәвәрдә баян қилишичә, 1949 ‏- йилидин бурун, шинҗаңда һинди-явропа ерқиға мәнсуп түркий тилда сөзлишидиған уйғурлар, нопусниң % 90 ни тәшкил қилатти. Һазир нопусниң % 45 ни тәшкил қилидиған әһвалға чүшүп қалғанда, уйғур балилири оғрилап кетилип хитайниң ички өлкилиридә янчуқчилиққа селиниватиду. Шинҗаң иҗтимаий пәнләр академийисиниң мөлчәрлишичә, ички өлкиләрдә янчуқчилиққа селиниватқан уйғур балилириниң сани 4000 дин артуқ. (Вәли)