Wang léchüenning sözi Uyghurlargha qaritilghan basturushning küchiyishidin dérek béridiken

Xitay hökümitining Uyghur aptonum rayonigha teyinligen partkom bash sékritari wang léchu'en charshenbe küni ayaqlashqan ediliye- qanun ishliri xizmet yighinida söz qilip, Uyghur élidiki "üch xil küchler" ge qarshi yuqiri bésimliq basturush siyasitini dawamliq yürgüzidighanliqini bildürdi.

Xitay hökümitige qarashliq tengritagh tor bétining peyshenbe küni bergen xewiridin ashkarilinishiche, wang léchu'en yighinda, qanun we ediliye xadimliridin xelq ichidiki ziddiyetni yumshitishqa ehmiyet bérishni, shuning bilen bille, "üch xil küchler" lerge aktip zerbe bérish, bash kötürgen haman basturush we aldin kontrol qilishtin ibaret yuqiri bésimliq siyasetni boshashturmasliqni telep qilghan.

Yéqindin buyan xitayning bir qisim jaylirida, puqralar bilen ediliye - qanun organliri arisida ziddiyet küchiyip, zorawanliq toqunushlar kélip chiqqan . Buning bilen xitay jama'et xewpsizlik ministiri, qanun ijra qilish da'irilirini puqralargha qaratqan mu'amilisini yaxshilashni telep qilghan idi.

Wang léchü'enning " üch xil küchler" ge yuqiri bésimliq basturush siyasitini yürgüzüsh heqqidiki sözi, chet'eldiki Uyghur teshkilatliri we bir qisim kishilik hoquq teshkilatlirining endishisini qozghighan. Bash shitabi amérikidiki xitay kishilik hoquq teshkilatining bildürishiche, xitay hökümitining atalmish” bölgünchi, térrorchi we diniy radikal" digen uqumigha hichqandaq éniqlima bérilmigechke, xitay hökümiti öz siyasiy we diniy köz qarishini otturigha qoyghan her qandaq Uyghurlarni, bu katigoriyige kirgüzüp basturalaydiken.

Dunya Uyghur qurultiyining bayanatchisi dilshat rishit ependimu, wang léchü'enning bu sözining xitay da'irilirining Uyghurlargha qaratqan siyasiy we diniy basturushni téximukücheytishidin dérek béridighanliqini bildürmekte. (Arzu)