Merhum edip batur rozining neziri bérildi


2007.04.01
Share on WhatsApp
Share on WhatsApp

Uyghur yéngi dewr edebiyatida közge körün'gen ediblerning biri, sergerdanliq, musapirliq ichide ötken ijadiy hayati we ötkür tenqidiy pikirler hem pelsepiwi tepekkurlar bilen yughurulghan köpligen shé'ir, obzor hem bashqa eserliri arqiliq qelemkesh dostliri teripidin ottura esir jahalet dewri bilen élishqan kilassik sha'ir shah meshrepke oxshitilghan merhum batur rozining yette nezirisi yekshenbe küni uning yurti yeken nahiyisining kachung yézisi, chimdu kentide bérildi.

Igilishimizche, batur rozi 3-ayning 27-kuni ürümchide tuyuqsiz qozghalghan yürek tiqilmisi bilen 41 yéshida wapat bolghandin kéyin 28- mart küni öz yézisigha élip kélinip depne qilin'ghan. Uning depne murasimi zor sandiki her sahege mensup kishilerning qatnishishi bilen ötküzülgen bolsa, yette nezirisi téximu heywetlik tüs alghan.

Éniq uchurlargha asaslan'ghan edibning nezirisige yeken tewesidin bashqa yene qeshqer, aqsu, xoten shuningdek bashqa qoshna nahiyilerdin kelgen texminen birer qanche yüz etrapida adem qatniship, öz millitining edebiyat-sen'iti, medeniyiti yolida pütün wujudi bilen xizmet qilghan merhum yazghuchigha bolghan chongqur söygüsi we hörmitini izhar qilishqan.

Igilishimizche, Uyghur élining her qaysi jayliridiki we chet'ellerdiki qelemkeshler batur rozigha bolghan öz teziyilirini we séghinish hem hörmetlirini her xil usullar bilen bildürgen.

Uchurlardin qarighanda, bir türküm Uyghur qelemkeshliri batur rozining 40 nezirsini mol mezmunluq bir shekilde ürümchide ötküzüshni oylashqan iken.

Batur rozining a'ile tawabatliridin igilishimizche hem bashqa türlük uchurlargha asaslan'ghanda, merhumning pütün ömri japa-musheqqet ichide ötken bolup, gerche u talantliq bir edib hem qelem igisi bolushigha qarimay, ömür boyi ishsiz qélip, qiyin turmush kechürüshke mejbur bolghan, lékin u qet'iy boshashmay qelem tewritip, bir roman we köpligen shé'irlar hem obzorlarni neshir qildurghan. Bir qisim yézip qoyghan tarixiy roman hem kitabliri neshir qilinishni kütiwétiptu. (Ümidwar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.