Хитай нефитлиги уйғур елидә нефит-химийә чоң базиси қурмақчи

Хитайниң әң чоң нефит вә тәбиий газ гуруһи 27 милярд юән мәбләғ билән уйғур елидә, оттура асия райони бойичә әң чоң нефит-химийә базиси қурмақчи. Хитай нефитлиги бу түргә йәнә 8 чәтәл ширкитиниму қошивалидикән.

"Шаңхәй шәрқ әтигәнлик гезити" ниң хәвәр қилишичә, хитай нефитлигиниң чәтәл ширкәтлири билән бирлишип уйғур елидә қуридиған бу нефит химийә базиси 2008 - йили рәсмий пүтүп болмақчи һәмдә бу орун йилиға 5 йерим милйон тонна нефит вә 1 милйон 8 йүз миң тонна химийә-санаәт мәһсулатини ишләпчиқиришдиған болуп, буниңдин йилиға 30 милярд юән кирим қилғили болидикән.

Хәвәрдә көрситилишичә, бу нефит-химийә базиси, хитайниң қазақистан билән болған нефит истратегийә һәмкарлиқиниң муһим бир қисми болуп, қазақистандин газ турубилири арқилиқ киргән нефит алди билән бу базида пишшиқлап ишлинип, андин хитайниң ичкири өлкилиригә әвәтилидикән.

Хитай нефит-химийә санаити вә сетиш мулазимәт ширкитиниң дериктори сүн ли, хитайниң чәтәл ширкәтлири билән бирлишип елип баридиған бу түрниң, уйғур елиниң нефит-химийә түрини тәрәққий қилдурушиға пайдилиқ болидиғанлиқини ейтти.

Әмма уйғур ели вә чәтәлләрдики бир қисим зиялийлар, хитайниң ғәрбни ечиш сиясити вә нефит қидириш хизмәтлириниң йәрлик хәлқләргә һечқандақ пайда йәткүзмәйдиғанлиқини, буниңдин йәнила хитайларниң зор мәнпәәткә еришидиғанлиқини билдүрмәктә. (Пәридә)