Bingtüendikilerning yilliq kirimi 11 ming yü'endin ashti, amma Uyghurlarningchu ?

Xitayning Uyghur ilidiki yérim herbiy teshkilati, shinjang bingtüenining kishi béshigha toghra kélidighan yilliqi kirimi 11 ming 780 yüen'ge yétip, yerliktiki Uyghurlarning kirimi bilen roshen sélishturma shekillendürgen.

Aptonom rayon partkomining zuwani "shinjang géziti " ning ashkarilishiche, bingtüen qomandani jang chingli, "bu bingtüenning derwazisini téximu keng échiwetkenlikining netijisi", dep jakarlighan. "Shinjang géziti" , yéqinqi ikki yil ichide bingtüen'ge kirgen tashqiy mebleghning ikki milyard yüen'ge yétidighanliqini, bingtüenning 2004 - yili köchmes mülkke salghan meblighi, 10 milyard yü'endin ashidighanliqini ashkarilidi. Biraq xitay metbu'atliri, Uyghur aptonom rayonining jenubidiki qeshqer, xoten , aqsu, qizilsularda Uyghur dihqanlarning yilliq kirimi 1000 yü'en'ge yetmeydighanliqini bildürmekte.

"Shinjang géziti" ning xewirige qarighanda, bingtüendikilerning kirimi yerliktiki Uyghur dihqanlardin 12 hesse éship ketken. Dunya Uyghur qurultiyining bayanatchisi dilshat rishitning bildürüshiche, Uyghur déhqanlarning néme tériydighanliqi shundaqla mehsulatini kimge satidighanliqini hazirghiche xitay hökümiti belgilimekte.

Xitay bash ministiri wén jyabaw, bu yil 8 - ayda sherqiy türkistanni ziyaret qilip, bingtüenni téximu kücheytishni qollighan. U, sherqiy türkistan musteqilliq terepdarlirini basturush yolidiki "üch xil küchlerge qarshi turush, bingtüenning kücheytish seweplirining biri" , dep körsetken idi. Bingtüen 1954 - yili qurulghan, 1970 - yillarni otturiliri seypidin eziz teripidin tarqitiwétilgen .Xitay hökümiti 1980 - yillarda bingtüenni qayta eslige keltürgen idi. (Erkin)