Уйғур елидики бокс маһирлири қазақистанда икки айлиқ мәшиққә қатнашмақчи

Уйғур елидики бокс командиси, хитайниң келәр йиллиқ бокс мусабиқисигә қатнишип яхши нәтиҗигә еришиш үчүн, қазақистанда икки айлиқ мәшиқ елип беришни қарар қилип, бир қанчә күн илгири қазақистанға қарап йолға чиққан.

Тәңри тағ ториниң бу һәқтә бәргән хәвиригә қариғанда, мәзкур командиниң асаслиқ маһирлири, баш теринир абликим абдурешит, теринир абдушукүр меҗитләрниң йетәкчиликидә қазақистанда икки айлиқ мәшиқ елип баридикән.

Хәвәрдә, бу қетимқи қазақистандики мәшиқ вә мусабиқигә абликим вә абдушукурниң йетәкчилигидә абдурахман абликим, қанат ислам, әкрәм исһақ, әкрәм барат, абдурусул рози, тәливқан қатарлиқ маһирларниң қатнишидиғанлиқи билдүрүлгән.

Бокс тәнһәркити, күч вә маһарәт тәләп қилидиған юқири сәвийилик тәнһәрикәт түри болуп, уйғур елидики мусабиқиләрдә һәмдә хитайниң дөләтлик мусабиқлиридә уда бир нәччә қетим уйғур вә қазақ маһирлар алтун медалға еришкән.

Қазақистан бокс тәнһәрикитидә дуняви алдинқи қатардики сәвийидә болуп, бу қетимқи мәшиқтә уйғур ели маһирлири тактика вә мусабиқә тәҗирбисини өстүрүп, хитайниң дөләтлик мусабиқисидә техиму көп алтун медал илиш ишәнчисини турғузиши мумкин. (Арзу)