خىتاي غۇلجا شەھىرىدە "بۆلگۈنچىلىككە قۇترىتىش ۋەقەلىرى"دىن بىر قانچىنى پاش قىلغان

  خىتاي دائىرىلىرى يېقىندىن بېرى ئىلى تەۋەسىدىكى ھەر قايسى ناھىيە ۋە شەھەرلەردە كەڭ كۆلەملىك " تازىلاش" ھەرىكىتى قوزغاپ، بولۇپمۇ غۇلجا شەھىرىدە ئۇيغۇرلار توپلىشىپ ئولتۇراقلاشقان مەھەللە ۋە يېزىلاردا ئۆيمۇ - ئۆي ئاختۇرۇش ئېلىپ بارماقتا ئىدى.

دۇنيا ئۇيغۇر قۇرۇلتىيىنىڭ باياناتچىسى دىلشات رىشىتنىڭ ئەسكەرتىشىگە قارىغاندا، دائىرىلەر يەنە 5700 پارچىدىن ئارتۇق ئاتالمىش "ئەكسىلئىنقىلابىي" مەزمۇندىكى كىتابچە ۋە مەتبۇئات بۇيۇملىرىنى يىغىۋالغان. دۇنيا ئۇيغۇر قۇرۇلتىيى قولغا ئېلىنغانلارنىڭ ئىسمى، ۋەقەنىڭ غۇلجىدىكى قايسى مەھەللىلەردە يۈز بەرگەنلىكى ۋە دائىرىلەرنىڭ تۇتقۇنلارنى قانداق بىر تەرەپ قىلىدىغانلىقى ياكى قىلغانلىقىغا دائىر كونكرېت ئەھۋاللارنى ئاشكارىلىمىدى شۇنداقلا بۇ خەۋەرنىڭ راستلىقى يەرلىك ساقچى دائىرىلىرى تەرىپىدىن ئىسپاتلانمىدى. لېكىن غۇلجىدىكى يەرلىك ساقچى ئورگانلىرى پەيشەنبە كۈنى غۇلجىدا "مەركەزلىك تازىلاش" ھەرىكىتى ئېلىپ بېرىلىۋاتقانلىقى، ھەرىكەتنىڭ توغراق يېزىسىدىكى ئۇيغۇر مەھەللىلىرىنى، ئۈچ دەرۋازا ئاھالىلار رايونىنى مەركەز قىلىپ قانات يايدۇرۇلۇۋاتقانلىقىنى ئېتىراپ قىلغان.

خىتاي ھۆكۈمىتى ئولىمپىك يىغىنى " شەرقىي تۈركىستان كۈچلىرى"نىڭ تەھدىتىگە دۇچ كېلىۋاتقانلىقىنى ئەسكەرتىپ، ئۇيغۇرلارنى نىشان قىلغان بىخەتەرلىك تەدبىرلىرىنى كۈچەيتكەن بولسىمۇ، لېكىن خەلقئارا ئاممىۋى تەشكىلاتلار خىتاينى بىخەتەرلىك ۋە تېررورچىلىقنى باھانە قىلىپ، ئۇيغۇرلارنى باستۇرۇۋاتىدۇ، دەپ ئەيىبلىمەكتە.