Xitay ili wadisini pütün xitay boyiche boz yer achidighan nuqtiliq rayon qilip békitti

Ili wadisi, xitay boyiche 6 nuqtiliq boz yer échish rayonining biri qilip békitilgen.

Xitay xewer torining 2 ‏- mart küni bergen xewirige qarighanda, mezkur pilan boyiche ili wadisidiki 7 nahiye bilen ishlepchiqirish qurulush armiyisining yéza igilik 4 ‏- déwiziyisining meydanliri boz yer échish rayonliri qilip békitilgen bolup, 109 milyon 650 ming mo yer qayta échilidiken.

Bu pilan, xitayning döletlik yer we bayliq ministirliqining telipige asasen élip bérilghan bolup, közetküchiler ili wadisini asas qilip élip bérilidighan mezkur boz yer échish qurulushi, bu diyarda xitay hökümitining köchmen köpeytish siyasitining izchillishiwatqanliqining delil ispati dep bildürmekte.

Ular yene, 1949 ‏- yilidin béri, xitay hükümiti Uyghur aptonom rayonida boz yer échish qurulushini yolgha qoyghandin béri, ishlepchiqirish qurulush armiyisining nurghun polkliri ili deryasi boyidiki munbet zéminlarni igilep , otlaq we ormanlarni buzup, boz yer échip, bu jaydiki yerlik Uyghur , qazaq xelqining iqtisadigha zor ziyanlarni keltürüpla qalmastin , güzel ili wadisining ékologiyilik muhitini bozghunchiliqqa öchratti dep tekitlimekte. (Eqide)