Xitay hökümiti örkeshtam chégra éghizini qayta achti

Qirghizistandiki weziyetning muqimlishishqa qarap yüzlinishi bilen, xitay hökümiti Uyghur aptonum rayoni bilen qirghizistan otturisidiki örkeshtam chégra éghizini qayta achti.

Amérika birleshme axbarat agéntliqining bildürüshiche, xitay hökümiti, qirghizistandiki siyasiy özgirish sewebidin örkeshtam chégra éghizini alte kün taqighandin kiyin, düshenbe küni uni qayta achqan. Biraq xitay tashqi ishlar ministirliqining bayanatchisi lyu jenchaw seyshenbe küni, xitay puqralirini zörür bolmisa, qirghizistan'gha barmasliqqa agahlandurdi.

Qirghizistandiki hakimiyet özgirishi jeryanida yüz bergen bulang - talang weqeliride Uyghur élidin barghan Uyghur sodigerliri köp ziyan'gha uchrighan idi. Lyu jenchaw bayanatida, weqelerde on nechche puqrasining yarilinip, üchining ehwalining éghir ikenlikini bildürdi. Emma u bu kishilerning dölet teweliki we yaki milliti sewebidin nishan'gha élin'ghanliqini ret qildi.

Buning aldida fransiye axbarat agéntliqi, béshkektiki Uyghur sodigerliri jaylashqan medine soda bazirini bulang- talang qilghan qirghiz yashlirining mexsus Uyghurlargha hojum qilghanliqini xewer qilghan idi.

Chet'el metbu'atlirining xewerlirige qarighanda, qirghizistandiki weziyet muqimlishishqa qarap yüzlen'gen. Qirghizistanning aldinqi qarar parlaménti seyshenbe küni yéngi parlaméntning dölet ichidiki jiddiy weziyetni yaxshilash chaqirigha awaz qoshup, özlikidin tarqilishqa qoshulghan. Buning bilen qirghizistandiki jiddiy palamént kirizisi ayaqlashqan.

Bu arida, rusiyige qéchip ketken qirghizistan prézidénti esqer aqayéf özining qirghizistanning birdinbir qanun boyiche saylan'ghan prézidénti ikenlikini körsitip, wezipisidin istipa bermeydighanliqini bildürdi. (Arzu)