Xitay hökümiti qirghizistan bilen Uyghur éli otturisidiki chégra éghizlirini taqidi

Xitay hökümiti qirghizistan öktichilirining aqayéwni aghduruwétish weqesidin kéyin, Uyghur aptonom rayoni bilen qirghizistan otturisidiki chégra éghizlirini taqidi. Shinxu'a axbarat agéntliqi, xitay hökümitining qirghizistan'gha chiqidighan chégra éghizlirini 23 - marttin 28 - martqiche waqitliq taqighanliqini xewer qildi.

Xitay hökümiti, " qirghizistandiki qalaymiqanchiliq shundaqla yoluchilar we yoluchilar mal - mülkining bixeterliki qatarliq seweplerdin örkeshtam chégra éghizini waqitliq taqighan." Biraq Uyghur aptonom rayonidiki bashqa chégra éghizliri adettikidek ochuq turudiken. Xitay tashqi ishlar ministirliqining bayanatchisi lyu jyenchaw, jüme küni xitay da'irilirining qirghizistan weziyitini yéqindin diqqet küzütiwatqanliqini bildürdi.

Roytérs axbarat agéntliqining xewer qilishiche, qirghizistanning amérikida turushluq bash elchisi, qirghizistan weziyitining uzun - muddetlik muqimsizliqi amérika, rusiye we xitayning qatarliq döletlerning rayondiki tesirige selbiy tesir körsitidu, dep tekitligen.

Xitay tamozhnisidiki da'irilerning bildürüshiche, hazirqi pesil ikki dölet sodisining eng chap - chap mezgilige toghra kelgenliktin, chégra éghizini taqash ikki dölet arisidiki sodigha melum derijide tesir yetküzidiken.

Roytérs axbarat agéntliqi, xitay hökümiti qirghizistandiki weqelerning Uyghur aptonom rayonigha yamrap kétishidin ensireydighanliqini ilgiri sürdi. Uyghur aptonom rayoni bilen qirghizistan 1100 kilométir uzunluqtiki ortaq chégra liniyisige ige. (Erkin)