10 Oqughuchi en'giliye, kanada döletliridiki 39 aliy mektepning qobul qilish uqturushini tapshuruwaldi

Uyghur aptonom rayonidiki toluq ottura mektepni püttürgen 10 oqughuchi tunji qétim, en'giliye, kanada qatarliq döletlerdiki 39 aliy mektepning resmiy qobul qilish uqturushini tapshurup alghan. Bu 10 oqughuchining her birsi birdin artuq mekteplerdin chaqiriq tapshuruwalghan bolup, ular shu chaqiriq kelgen mekteplerdin birni, arzuliri boyiche, talliwélish hoquqi bar iken.

Tengritagh torining 28 ‏- iyun küni bergen xewiridin melum bolushiche, Uyghur aptonom rayonidiki toluq ottura mektepni püttürgen bu oqughuchilar eger en'giliye we kanadadiki mekteplerge qobul qilinsa ulargha 1000 fondstérlingdin 3000 fondstérlingghiche oqush mukapati bérilidiken. Bu oqughuchilarning ichidiki bireylen yene 100ming yüenlik oqush mukapatigha érishidiken.

Uyghur aptonom rayonida toluq ottura mekteplerni püttürgenlerning , chet'ellerdiki aliy mekteplerge biwaste qobul qilinishi Uyghur aptonom rayon tarixida tunji qétimliq ish hésablinidiken. Xewerde éytilishiche, bu on oqughuchi ürümchide en'giliye kambirich uniwérsitétining yéngi tüzülgen derslikini tamamlighan bolup, mezkür derslik dunyada eng keng qollinidighan asasiy ma'arip séstimisi iken.

Dunya Uyghur qurultiyining bayanatchisi dilshat réshitning bildürishiche, gerche Uyghur oqughuchilar, chet'ellerdiki dangliq aliy mekteplerde oqushni köp arzu qilsimu, köp hallarda siyasiy we iqtisadiy bésimlar tüpeyli oqush pursitige érishelmeydiken. Uyghur oqughuchilar, chet'ellerdiki aliy mekteplerge qobul qilinish derijisige yetsimu , biraq ma'arip organliri sanni monopol qilip, Uyghurlarni bu xil pursetlerdin mehrum qalduridiken. (Eqide)