Хитай уйғур елини ғәрбий шималидики әң чоң чошқа базиси қилип қуруп чиқмақчи


2007-11-05
Share

Хитайниң уйғур елидә турушлуқ чарвичилиқ назарити тарқатқан хәвәрләргә қариғанда, хитай уйғур елини кәлгүси он йил ичидә ғәрбий шималдики әң чоң чошқа беқиш базиси қилип қуруп чиқиш қурулуш түригә мәбләғ селишни башлиған болуп, тәңритағ торида бу һәқтә берилгән хәвәрдә ашкарилинишичә, аптоном районлуқ һөкүмәт һәр йили 10 милйон йүән мәбләғ аҗритип мәхсус чошқа беқиш түрини тәрәққий қилдуридикән.

Тәңритағ торида мунасивәтлик һөкүмәт органлириниң пикридин нәқил елип көрситишичә, хитай һөкүмити уйғур елидә чошқа беқиш базилири орунлаштурулидиған районларни дәсләпки қәдәмдә бекитип болған болуп, булар асасән, санҗиниң шәрқи қисми, қумулниң шимали, тәңритағ етикидики районлар, или вадиси, тарим ойманлиқи, җуңғар ойманлиқидики районлар, корла шәһири, ақсу вә қәшқәр вилайитигә җайлаштурулған икән.

Мәлум болушичә, һазир юқириқи районларда көләмлик чошқа беқиш фермилири тәрәққий қилдуруш қурулуши, бақмичилиқ районлири, төл елиш вә кәсипләштүрүш қурулушлири алла бурун башлинип болған.

Дуня уйғур қурултийи баянатчиси дилшат ришитниң билдүрүшичә, асасий аһалиси ислам диниға етиқад қилидиған , диний өрп ‏- адәт қоюқ түс алған уйғур елидә, хитай һөкүмитиниң чошқа беқиш базилирини кәң көләмдә тәрәққий қилдуруши, мәзкур райондики мусулманларниң диний вә турмуш өрп адәтлиригә қилған чоң һақарәт болуп, хитайниң бу қилмиши кәң уйғур или җамаитиниң наразилиқини қозғайдикән.

У мундақ дәйду: "хитай уйғур елидә чошқа беқиш түрлиригә мәбләғ селиш қурулушини башлап, мәзкур райондики мусулман амминиң турмуш вә диний өрп адитигә қаттиқ һақарәт қилди. Хитай кишилик һоқуқ дәпсәндичиликигә берип тақилидиған бу қилмишини дәрһал тохтитиши керәк." (Җүмә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт