Уйғур аптоном районида йеза - кәнт давалаш һәмкарлиқ фонди түзүми омумлаштурилиду

Уйғур аптоном райони парткоминиң секритари ваң лечүән йеқинда чақирилған аптоном районниң йеза хизмәт йиғинида, йеза - кәнт давалаш фонди түзүмини аптоном район бойичә омумлаштуруш йолйоруқи бәрди. Әмма у, давалиниш һәққи қиммәт болуш әһвалиға қарита йәрлик даириләрниң чарә - тәдбир тепишини тәләп қилған.

" Шинҗаң иқтисад гезити"ниң хәвәр қилишичә, йеза - кәнт давалаш фонди түзүми һазирғичә аптоном райондики 53 наһийә - шәһәрдики бәзи нуқтиларда синақ тәриқисидә йолға қоюлған болуп, ваң лечүән бу түзүмниң 2007 - йили аптоном район бойичә омумлаштурулушини тәләп қилған. " Шинҗаң иқтисад гезити"ниң әскәртишичә, йеңи түзүм бойичә диһқанларниң давалаш фондиға төләйдиған йиллиқ пули 50 сом болуп, буниң 20 сомини дөләт төләйду, 20 сомини аптоном район чиқириду, ,10сомини деһқанлар үстигә алидикән.

Әмма көзәткүчиләр, бу түзүмни өткүнчи бир чарә болуп, деһқанларниң давалиниш мәсилисини һәл қилалмайду, дәп көрсәтмәктә. Йиғинда ваң лечүән, қошумчә ярдәм пулиниң сани чәклик болғанлиқтин давалиниш һәққи қиммәт болуштәк әһвални һәл қилалмайдиғанлиқини етирап қилған. Диһқанларниң давалиниш мәсилиси уйғур аптоном районида пуқралар дуч келиватқан әң еғир мәсилә. Мәлуматларда көрситилишичә, давалиниш һәққини төләшкә қурби йәтмәйдиған нурғун деһқанлар, өлүмни күтүшкә мәҗбур болмақта.

Ваңлечүән," чәклик қошумчә ярдәм пули давалиниш қиммәт болуш қатарлиқ әһвалларни һәл қилалмайду," дәйду. Әмма у, қошумчә ярдәм пули давалиниш һәққини төләшкә йәтмәйдиған бу усулни немә үчүн аптоном район бойичә омумлаштуруш йолйоруқи беридиғанлиқини чүшәндүрмигән. У, алақидар органларниң көпрәк күч чиқиришини тәләп қилип, мәсулийәтни йәрлик даириләргә йүклимәктә. У, алақидар тәрәпләр бу мәсилә үстидә көпрәк тәтқиқат елип берип, һәл қилиш чариси түзүп чиқишни тәләп қилған. (Әркин)