Uyghur aptonom rayonida yéza - kent dawalash hemkarliq fondi tüzümi omumlashturilidu

Uyghur aptonom rayoni partkomining sékritari wang léchüen yéqinda chaqirilghan aptonom rayonning yéza xizmet yighinida, yéza - kent dawalash fondi tüzümini aptonom rayon boyiche omumlashturush yolyoruqi berdi. Emma u, dawalinish heqqi qimmet bolush ehwaligha qarita yerlik da'irilerning chare - tedbir tépishini telep qilghan.

" Shinjang iqtisad géziti"ning xewer qilishiche, yéza - kent dawalash fondi tüzümi hazirghiche aptonom rayondiki 53 nahiye - sheherdiki bezi nuqtilarda sinaq teriqiside yolgha qoyulghan bolup, wang léchüen bu tüzümning 2007 - yili aptonom rayon boyiche omumlashturulushini telep qilghan. " Shinjang iqtisad géziti"ning eskertishiche, yéngi tüzüm boyiche dihqanlarning dawalash fondigha töleydighan yilliq puli 50 som bolup, buning 20 somini dölet töleydu, 20 somini aptonom rayon chiqiridu, ,10somini déhqanlar üstige alidiken.

Emma közetküchiler, bu tüzümni ötkünchi bir chare bolup, déhqanlarning dawalinish mesilisini hel qilalmaydu, dep körsetmekte. Yighinda wang léchüen, qoshumche yardem pulining sani cheklik bolghanliqtin dawalinish heqqi qimmet bolushtek ehwalni hel qilalmaydighanliqini étirap qilghan. Dihqanlarning dawalinish mesilisi Uyghur aptonom rayonida puqralar duch kéliwatqan eng éghir mesile. Melumatlarda körsitilishiche, dawalinish heqqini töleshke qurbi yetmeydighan nurghun déhqanlar, ölümni kütüshke mejbur bolmaqta.

Wangléchüen," cheklik qoshumche yardem puli dawalinish qimmet bolush qatarliq ehwallarni hel qilalmaydu," deydu. Emma u, qoshumche yardem puli dawalinish heqqini töleshke yetmeydighan bu usulni néme üchün aptonom rayon boyiche omumlashturush yolyoruqi béridighanliqini chüshendürmigen. U, alaqidar organlarning köprek küch chiqirishini telep qilip, mes'uliyetni yerlik da'irilerge yüklimekte. U, alaqidar terepler bu mesile üstide köprek tetqiqat élip bérip, hel qilish charisi tüzüp chiqishni telep qilghan. (Erkin)