Ataqliq usulchi dilnar abdulla namida medeniyet fondi jem'iyiti quruldi

10 - Iyul küni ürümchide, Uyghur xelqining dangliq usulchisi, memliketlik birinchi derijilik sen'etkar dilnar abdulla namida "dilnar edebiyat- sen'et we medeniyet almashturush tereqqiyat fondi jem'iyiti" quruldi. Shinxu'a agéntliqining xewiride körsitilishiche, mezkur fondi jem'iyet shexs namida qurulghan tunji sen'et fondi hésablinidiken.

Dilnar sen'et fondi Uyghur aptonom rayonluq edebiyat sen'etchiler birleshmisi bashqurushida qurulghan bolup, asasliqi Uyghur élidiki milletlerning edebiyat -sen'et ijadiyiti, neziriyiwiy tetqiqati we talant igiliri hemde ixtisas igilirini yétishtürüsh, qiyinchiliqi bar sen'et ögen'güchilerge yardem bérish shundaqla Uyghur élidiki mejruh hemde yétim balilargha yardem bérish türlirini öz ichige alidiken. Mezkur fondi jem'iyet yene munewwer sen'et eserliri hemde sen'etkarlargha mukapatmu tesis qilghan.

Fondi jem'iyetni qurush layihisini otturigha qoyghuchi dilnar abdulla muxbirlargha qilghan sözide " méning sen'et sahesidiki nam ‏- sheripim hemde jem'iyettiki tesirimning türtkiside mushu fondining wasitisi bilen ammining qollishigha hemde saxawetlik yardemlirige érishish arqiliq Uyghur élining medeniyet sahesining tereqqiyatigha töhpe qoshush, ammiwi medeniyet -sen'et mulazimitide yenimu türtkilik rol oynash arzuyum bar " deydu.

Mezkur fondi jem'iyet qurulushi bilenla on nechche shirket hem orunlarning bes ‏- beste iqtisadi yardimige érishken. Dunyagha tonulghan yuqiri awazliq naxshichi dilber yunusmu fondigha yardem qolini sun'ghan saxawetchiler qataridin orun alghan. (Gülchéhre)