Xitay hökümiti diniy pa'aliyetlerni kontrul qilishni yenimu kücheytti

Uyghur élidiki xitay hökümet tor bétidin ashkarilinishiche, xitay kommunistik partikomi yéqinda Uyghur élining her qaysi wilayet, nahiyilirige Uyghur élidiki diniy pa'aliyetchilerge bolghan kontrolluqini kücheytish toghrisida mexsus uqturush chüshürgen.

Dunya Uyghur qurultiyi érishken mezkur uqturush mezmunigha qarighanda, xitay hökümiti diniy sorunlarni qattiq nazaret qilish, yilda tekshürüp turush, qanuniy tizimgha aldurush, diniy zatlargha we diniy orunlarni shertlerge asasen mukapatlash qatarliq belgilimiler arqiliq diniy sorun hem diniy zatlarni nazaret qilishni kücheytkendin bashqa, diniy pa'aliyetchilerning étiqad pa'aliyetlirinimu mezkur cheklimiler arqiliq kontrol qilishni kücheytidiken.

Xitay hökümiti Uyghur élide diniy pa'aliyetlerge bolghan kontrolluqini kücheytish bilen bir peytte, her qaysi sahediki diniy zatlarni kommunizm éngida terbiyilesh, ularni xitay hökümitining diniy siyasetlirini teshwiq qilishqa xizmet qildurush üchün mexsus kuruslarni échip terbiyiligen.

Muxbirlirimizning igilishiche, Uyghur élining bezi jaylirida yüzini yapqan ayallarning yaghliqini mejburi achquziwétidighan, islam murtlirining saqal- burutlirini mejburi chüshürwétidighan'gha oxshash diniy erkinlik we kishilik hoquqqa dexli- teruz qilish qilmishliri éghirlimaqta.(Gülchéhre)