Xitay Uyghur élide diniy erkinlikni boghiwatidu

In'glizche chiqidighan "jenubiy xitay ettigenlik géziti" charshenbe küni naylin cho'uning (Nailene Chou) ning qeshqerdiki ziyaritidin kéyin, Uyghurlarning diniy erkinlik ehwali heqqide yazghan bir parche maqalisini élan qildi.

Aptor maqalisining béshida qeshqerdiki héytkah meschiti qatarliq qedimiy jaylar we nöwettiki qeshqer körünüshlirini süpetlep kélip, bu yerdiki Uyghurlarning herqandaq xildiki diniy pa'aliyet yaki qarshiliqlirining xitay hökümiti teripidin qattiq basturilidighanliqini yazghan.

Maqalida yene, gerche xitay hökümiti diniy erkinlikni shundaq kontrol qilsimu, lékin bu yerde yenila yer asti diniy mekteplerning dawamliq mewjut bolup turuwatqanliqi körsitilgen.

Aptor maqaliside, xitayning xelq'ara térrorluqqa qarshi küreshtin paydilinip, Uyghurlarni basturush qedimini tézlitiwatqanliqi heqqide toxtilip, "qattiq zerbe bérish herikiti" ning buning tipik misali ikenlikini tekitligen.

Jenubiy xitay ettigenlik gézitide élan qilin'ghan bu maqalide yene, xitayning Uyghurlarni basturush üchün ottura asiyadiki qoshna döletler bilen bolghan hemkarliqni kücheytkenliki shundaqla xitay emeldarlirining, iqtisadning tereqqiy qilishigha egiship, Uyghurlarning téximu köp diniy erkinlik telep qilishidin endishe qilidighanliqi yézilghan. (Peride)