Америка диний әркинлик комитети әзалири қәшқәрни зиярәт қилди


2005-08-21
Share

Уйғур елидә зиярәттә боливатқан америка диний әркинлик комитетиниң вәкилләр өмики үрүмчидики зияритини ахирлаштуруп йәкшәнбә күни уйғур елидики 3 күнлүк зияритиниң ахирқи бекити болған қәшқәргә кәлди. Улар бу йәрдә һейтгаһ мәсчитини зиярәт қилди һәмдә мәсчит имамлири билән сөһбәтләшти.

Мухбиримизниң қәшқәрдики һейтгаһ мәсчитидин игилигән учуриға қариғанда, америка хәлқара диний әркинлик комитети вәкиллири бу йәргә, қәшқәрдики уйғур һөкүмәт рәһбәрлириниң һәмраһлиқида йәкшәнбә күни чүштин кейин йәрлик вақит саәт 3 ләрдә келип, мәсчит ичини зиярәт қилған һәмдә мәсчит имамлиридин җүмә дамоллам, абдуқадир қари һаҗим вә әмәт қари һаҗим қатарлиқлар билән көрүшкән.

Мәлум болушичә, улар һейтгаһда 5 йеримларғичә зиярәттә болған. Шундақла америкилиқ вәкилләр қәшқәрдики зиярити давамида йәнә, қәшқәр вилайәтлик ислам мәктивиниму көздин көчүргән.

Уйғур елидики зияритини 19 - авғуст йәни өткән җүмә күни башлиған бу өмәк, қәшқәргә келиштин бурун үрүмчидә болған. Америка хәлқара диний әркинлик комитетиниң ярдәмчи тәтқиқатчиси миндий лармор (Lindy Larmore) ханим бу сәпәрни башлаштин бурун, әркин асия радиомизниң зияритини мәхсус қобул қилип, уларниң үрүмчидики зияритидә уйғур аптоном райониниң рәиси исмайил тиливалди билән һәмдә аптоном районлуқ диний ишлар комитетиниң мудири, җамаәт хәвпсизлик идарисиниң башлиқи, уйғур ели иҗтимаий пәнләр академийиси дин иниститутиниң мудири қатарлиқ һөкүмәт әрбаблири билән көрүшидиғанлиқини билдүргән иди.

Гәрчә бу өмәкниң хитайдики зиярити бир һәптидин буян давам қиливатқан болсиму, лекин хитай мәтбуатлирида вә уйғур елидики һәр қайси мәтбуатларда һазирғичә бу һәқтә һечқандақ хәвәр берилмиди. (Пәридә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт